Our Lady of Assumption Parish kum 50-na lawm a ni
Our Lady of Assumption Parish Golden Jubilee lawmna hi nizan hmasa khan LFCS Golden Jubilee Memorial Hall-ah Variety Programme hmanga bul tan niin Paul Zohmingthanga, Chairman PGJOC chuan inlawmna thu a sawi bakah Cate. Paul Zothansanga, Senior Most Catechist chuan thu a sawi a, Item chi hrang hrang entirin Media & Publicity Committee ten Video an siam chu thlirho a ni bawk.
Nimin khan Golden Jubilee lawmna pui ber hi neih niin chawhma lamah Mass Thianghlim hlan a ni a, Jubilee dar vuak ni bawkin chawhnu lamah inkhawm neih zui a ni a, Parish Priest Fr. Praveen Fernandes chuan inlawmna thu sawiin, he hun rawn hmanpuitu Aizawl Bialtu, Bishop Stephen Rotluanga chuan thu a sawi bakah Fr. Lawrence Kennedy leh Fr. Joseph Lalbiakthanga te bakah Fr. John Zosiama, Provincial SDB te pawhin thu an sawi a, Item chi hrang hrang entir a ni bawk a, Tlai lamah Jubilee lawmna ruai an theh nghal bawk a ni.
Serchhip khua ah hian kum 1962 khan Thinglian khua atangin Taisena te chhungkua rawn pemin anni hi Serchhip-a Roman Catholic awm hmasa ber nia hriat an ni a, kum 1969-ah Biak In hmasa ber sawin kum 1976 March ni 1-ah Serchhip Kohhran chu Parish-ah hlankai a ni a, tun thlengin Parish Priest mi 11 an awm tawh a ni. Serchhip Parish atang hian Sacred Heart Parish Lunglei, leh Our Lady of Mount Carmel Parish, Khawlailung te a ding tawh a, tun dinhmunah Serchhip Parish hnuaiah hian Our Lady of Assumption Church Serchhip, St. James Church Dinthar, All Saints Church New Serchhip, St. Joseph Church Hriangtlang, St. Anthony Church Thenzawl leh St. Joseph Church Bungtlang te an awm mek a, Kohhran member mi sang khat chuang an awm tawh bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!