Serchhip-ah ‘Kisan Mela & Exhibition-2026’ zofelin a tithate hnenah lawmman sem a ni
Agricultural Technology Management Agency (ATMA) Serchhip District buatsaih ‘Kisan Mela & Exhibition-2026’ kharna hi nimin chhun khan Serchhip Bazar chung zawl-ah neih niin khuallian nia he hun hmanpuitu Agriculture and Farmers' Welfare Department-a Addl. Director, B. Ramnunsanga chuan ATMA Serchhip District ten sum bei tham tak an hmuh hmanga hetiang Programme tha tak an buatsaih thei chu lawmawm a tih thu sawiin, ATMA a thawktute leh Agriculture Department a thawktute bakah an thawhpui Department hrang hrang leh Kisan Mela-a dawr hawngtu hrang hrangte chungah lawmthu a sawi a. Hetiang hun buatsaih thin hi kuthnathawktu ten an hmalakna kawng hrang hranga hriat belh an duh leh an mamawh hrang hrang an hmuh theihna tura mithiam te hmun khata an rawn theihna a nih thin thu sawiin, tun tumah pawh hian chhawr tangkaitu an tam hle nia an hriat thu leh lawmawm a tih thu a sawi a. Mizoram-a District thenkhat ah kuthnathawktu tam tak chu hnamdang leh ramdang mi te niin hmun thenkhat ah phei chuan an tharchhuah tam zawk chu State pawnlam mi ten a hlawkna an tel thu sawiin, Serchhip District chu Zofa ten thahnem ngai taka hna an thawhna leh a hlawkna pawh an telna a nih thu sawiin, kuthnathawktute pawhin hei hi kawng hrang hrangah an vanneihpui nia a hriat thu a sawi bawk.
Serchhip-a District Agriculture Officer (DAO) Lalchharliana kaihhruai he hunah hian ATMA Serchhip District-a Deputy Project Director Gregory Malsawmkima chuan Technical Report pein he Exhibition buatsaihna atan hian cheng nuai li (4) an hmuh thu leh an sum hmuh aia tam daih an sen thu sawiin, amaherawh chu mipui ten an hlut hle tih an hmuh thu leh lawmawm an tih thu a sawi bawk.
He hunah hian ATMA Serchhip District Project Director, Lalchhuansangi kaihhruaina hnuaia he Exhibition-a titha thlanchhuah te hnenah lawmman sem niin Department Stall zingah Agriculture Department chu pakhatna niin Land Resources, Soil & Water Conservation Department leh Fisheries Department ten an dawt a. FPO/Entrepreneurs/Individual Stall zingah Women 7 Star SHG (MzSRLM), North Vanlaiphai chu pakhatna niin NuMi Food Processing Industry, Thentlang chu pahnihna leh Darpawngi SHG (MzSPLM), Baktawng & Thentlang chu pathumna an ni a. A tel zawng zawngte hnenah lawmman hlan theuh ni bawkin kuthnathawktu zinga ATMA Staff thawhpui tha thlanchhuah mi pahnih- Lalrammawia, Chhiahtlang (Serchhip Block) leh Remlalmuana, East Lungdar (East Lungdar Block) te hnenah Farmers’ Friend Award hlan an ni bawk.
Comments
Post a Comment
I ngaihdan i sawi hian mipui ngaihdan i tarlang a ni!