Serchhip Bawrhsap hovin Chhiarpui neih mek thlirho
Serchhip DC Meeting Hall-a he thutkhawm ah hian Serchhip District-a Census Charge panga (5) viltu Officer-te chuan an Bial chhung theuha hmalakna hrang hrang leh hmasawnna awmte report an pe a, Census hlawhtling taka kalpui a nih theih nan hmalak zel dan turte pawh sawiho nghal a ni a. Bawrhsap Paul L. Khuma chuan Charge Officer-te hmalakna ah lawmthu sawiin, Phase-I (Houselisting & Housing Census) kalpui mekah Digital System hmanga data lakkhawm a nih avangin uluk taka vil zui reng tur leh harsatna awmte rang taka chingfel turin a chah a ni.
Serchhip District-ah hian Census hna thawk turin Bial (Charge) panga-ah inthen a ni a, heng Bial tinte viltu tur Charge Officer-te pawh tihfel ni tawhin Training an nei vek tawh a. Serchhip Notified Town Bial viltu chu Serchhip DIET Principal Jane C. Vanlalmuanpuii niin an huamchhungah hian Supervisor 8 leh Enumerator 47 an awm a. Thenzawl Notified Town viltu Charge Officer chu Serchhip leh Thenzawl SDEO Melody L. Betlu niin Supervisor 4 leh Enumerator 20 an awm bawk. North Vanlaiphai Notified Town Charge Officer chu North Vanlaiphai SDEO John Lakbiakliana Pachuau niin Supervisor 3 leh Enumerator 12 an awm a, Serchhip Rural Bial Charge Officer chu Serchhip BDO Dr. Lalramdintluanga niin Supervisor 11 leh Enumerator 60 an awm a. East Lungdar Rural Bial Charge Officer chu East Lungdar BDO Dr. Marilyn Lalruatkimi niin Supervisor 5 leh Enumerator 30 an awm bawk a ni.
Serchhip District-a Supervisor leh Enumerator te tan hian Training pawh neih ni tawhin inbuatsaihna ngawrh taka kalpui mek a ni.
Comments
Post a Comment
I ngaihdan i sawi hian mipui ngaihdan i tarlang a ni!