Lungdai khuaa vanduaina thleng ah mi pakhat boral

Lungdai khuaa chhungkaw pakhat chu nimin zing khan an chenna In-ah nikhaw hre lovin hmuh an ni a, an fanu kum 14 mi chuan nunna chan hmanin midang pahnih chu ZMC&H-a ICU-ah enkawl mek an ni.

Thudawn danin Lungdai-a cheng nu pakhat, Lalremsangi (Tei) chu nimin khan a hnathawhna hmun ah a thlen hunah a thlen loh avangin a thawhna dawr neitute chuan zing dar 10:00 velah ngaihven in an In kawngkhar tichhiain an lut a. Inchhung ah hian a fanu kum 14-a upa Priskil Vanlalhriatpuii chu thi-a lo awmin an nu ber Lalremsangi leh a fapa Austin Vanlalmalsawma te erawh chau taka lo awmin an thaw a lo la awm a, Lungdai PHC panpui an nih hnuah Durtlang-a Synod Hospital panpui leh an ni a, ICU an chan loh vangin ZMC&H panpui leh niin an nu ber Lalremsangi hi ICU-ah Ventilator hmanga thawk tir niin, Austin-a erawh ICU-ah enkawl in a dinhmun a tha deuh nia thudawn a ni.

Thudawnna chuan Lalremsangi te In luah hi RCC niin kawngka pawh a phui tha hle niin sawi a ni a, eirawngbawlna Gas an harsat avangin meihawl-in rawng an bawl nia ngaih a ni a, Oxygen an tlakchham avanga hetiang hi thlengah a hmutute chuan ngaiin, In chhung pawh hi a lo uap lum hle niin an sawi bawk. Vanduaina tawk Priskil Vanlalhriatpuii hi Lungdai PHC-ah Postmortem a nih hnuah Zanlawn-ah a ruang hi lak a ni a, lumen a nih hnuah Vawiin hian vuiliam a ni ang.