Ruihtheih thil leh infiamna chu thil inhal a nih thu Agriculture Minister in a sawi

Agriculture Minister PC. Vanlalruata chuan ruihtheih thil leh infiamna chu thil inhal a nih thu sawiin, ruihhlo chu Hnam tin te tan hmelma a nih thu a sawi bawk.
Serchhip District Volleyball Association (SDVA) buatsaih ‘CK Hyundai Serchhip District Volleyball Championship & Age Group Under-17 Boys & Girls Tournament 2026’ hawnna nimin-a Serchhip Vengchung Volleyball Court-a neih a hmanpuina ah Agriculture Minister PC. Vanlalruata chuan kan rama duhthlanna hmang suala ruihhlo ngai, chhanchhuah ngai tam tak an awm thu sawiin, ruihhlo chu Hnam tin te tan hmelma a nih thu a sawi a. Tunhma deuh atangin Mizote zingah pawh ruihhlo tih chu changkanna emaw ti an lo awm tawh thin thu sawiin, amaherawh chu changkanna ni lovin a hun hmaa kan thalai tam tak nunna suattu a nih thu a sawi a ni. Agriculture Minister chuan thalaite chu kan Hnam hmalam hriltu an nih thu leh sawrkar pawhin kawng hrang hrangah a duhsak thu sawiin, “Kan ram leh hnam la enkawltu tur in ni a, chuvangin ruihhlo laka kan fihlim chuan hmabak eng tak kan nei ang,” tiin ruihhlo chu infiamna nena thil inhal tlat a nih thu a sawi a. Infiammi tan mahni inthunun thei mi nih a tul thu leh chu chu hlawhtlinna bul a nih thu sawiin, hun awl ngah lutuk chu ruihhlo tih awlsam tak a nih thu leh kan nunphung ah pawh kan hlawhtlinna daltu lian tak a nih theih thu a sawi bawk.

He Tournament hawnna hun hi SVDA President, K. Tlangthanmawia chuan kaihruaiin khual zawm leh Bawrhsap, Paul L. Khuma chuan infiammi tan ruihtheih thil tih a pawi theih dan te sawiin, infiammi te chu ruihtheih thil ti chhin miah lo tur leh an lo ti chhin tawh a nih pawhin sim turin a chah a. He huna kalkhawm infiammi te chu infiamna lamah emaw, zirna lamah emaw pawh an nih tum ti hlawhtling tura tang tlat turin a chah bawk a ni.

Tunkar Zirtawpni thleng awh tura ruahman ‘CK Hyundai Serchhip District Volleyball Championship & Age Group Under-17 Boys & Girls Tournament 2026’ ah hian Category pali (4)-ah intihsiakna neih tura ruahman a ni a. Senior Men’s ah Team 12 telin Pool pali-ah thenin Pool khat-a awm zel te hi an inhmachhawn kual hnuah point hmu sang pahnih theuh ten Quarter Final an khel dawn a, Senior Women’s leh Under-17 Girls-ah Team 4 ve ve telin League System a khelh a ni dawn thung a. Under-17 Boys-ah Team 11 telin Pool pali-ah then an ni a, Pool tina point hmu sang pahnih ten Quarter Final an khel dawn bawk a ni.