Ramchhung hmundangte rualin Serchhip-ah ‘Fire Service Day/Martyrs Day’ hman a ni
Kum 1944 April ni 14 khan Indo lawng lian ‘S.S Fort Stikine’ an tih chu Mumbai Lawng chawlhhmun-ah thlengin he Lawng, ralthuam leh bomb lam chi tam tak phur hi a kang vak a. He kangmei rapthlak tak chhuak ah hian Bombay Fire Brigade-a mi 66 leh Bombay Salvage Corps-a mi 11 kangthelhtu te chuan an nunna an chan a. Heng mitthi te hriatrengna atan hian Fire Service Day hi April 14-ah hian hman a ni ta a. Hemi ni denchhen hian April ni 14 atanga April 20 chhung hi ‘Fire Service Week’ atan hman a ni ta bawk a. He Hapta hman chhung hian India rama Fire Service chi hrang hrang te chuan hmun hrang hrangah kangmei laka himna tur zirtirna an nei thin a. Kumin 2026 Fire Service Week thupui atan hian India Sawrkar chuan ‘Safe School, Safe Hospital & Fire Aware Society – Together for Fire Prevention’ tih chu an thlang a ni.
Serchhip Fire Station-a thawktute chuan ‘Fire Service Day/Martyrs Day’ pual hian nimin zing dar 9:00 khan New Serchhip Venglai-a an Pisa-ah hun hmangin kum 2025 chhunga India rama kangthelhna a nunna chan mi pahnih, Kerela Fire & Rescue Services-a thawk leh Uttarakhand Fire & Emergency Services-a thawk mi pakhat ve ve te sunna hun an hmang a. He hun hi Leading Fireman Laldinsanga chuan a kaihruai a ni. Serchhip Fire Station-ah hian thawtu mi pariat (8) an awm mek a, ‘Fire Service Week’ an hman chhung hian Serchhip-a Zirna In pahnih ah Fire Awareness Campaign & Mock Drill neiin Fire Safety Audit an neih dawn bakah Chhingchhip PHC-ah Fire Safety Audit an nei dawn bawk a ni.
Aizawl-ah chuan ‘Fire Service Day/Martyrs Day’ pual hian Hunthar Veng-a Fire & Emergency Services Headquarters-ah nimin zing khan hun hman a ni a, Fire & Emergency Services Department Director, HL. Thangzuala chuan India ram puma Fire Service Week hmanin a tum bulpui ber chu mipui vantlang leh mimal tin te, kan nitin nun, khawsak leh chetvelna tinrengah kangmei tichhuaklo tura invenna leh fimkhurna chang kan lo hriat deuh deuhna tura inzirtir a nih thu a sawi a. Kumin Fire Service Week thupui sawizau in Kangmei lakah School leh Damdawi In te a lo him zawk nan khawtlang mipuite kangmei tichhuak lo tura infuihna a nih thu a tarlang a. Fire Service Day 2026 pualin Department a thawk zawng zawngte chu mahni zawn theuhah inpekna thar nen, tha lehzuala hna thawk theuh tura sawmin, mipuite rawngbawltu an ni tih inhre thar theuh turin a chah nghal bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!