MPCC sawrkar chuan Dan hman mek ennawn tum

Mizoram Pradesh Congress Committee (MPCC) General Secretary leh AMC Corporator kalchhuak ta Rosiamngheta chuan nimin khan Aizawl Press Club-ah thuthar thehdarhtute kawmin, AMC-ah Congress Party-in sawrkarna an siam a nih chuan Aizawl khawpuia ranvulhna khuahkhirhna dan hman mek chu mipui tan zangkhai leh awmze nei zawka hman a nih theih nan hma an lak dawn thu a sawi a. Aizawl khawpuia Vawk vulh khapna dan chu AMC-a ZPM Corporator-te motion putluh a nih thu sawiin, MNF kaihhruai AMC sawrkarin Aizawl khawpui chhunga ranvulh khap tlatna Dan a lo siam chu zangkhai zawk leh awmze nei zawka hman anih theih nan an ennawn dawn tih a sawi a ni. Hei bakah hian Municipal chu mahni ro in rel a nih thu leh State sawrkarin an duh duh a an tihkual theih a ni lo tih pawh sawiin, Aizawl khawpui hmasawn leh timawi turin hma an lak dawn thu leh hemi atan hian tawnhriat nei Candidate an neih thu pawh a sawi bawk.