Mizoram sawrkar leh HPC-D (LF) ten inremna ziak; Tun thla ni 30-ah ralthuam tun a ni ang

Mizoram Sawrkar leh Hmar People’s Convention-Democratic (Lalhmingthanga Sanate’s Faction) te chuan nimin April 14, 2026 khan Sakawrdai Vengpui Community Hall-ah inremna, Memorandum of Settlement an ziak a, HPC-D mi leh sa 43 te chuan tun thla ni 30 khian an ralthuam an tung dawn a ni.
Mizoram Sawrkar leh Hmar People’s Convention-Democratic (Lalhmingthanga Sanate’s Faction) ten nimin-a inremna, Memorandum of Settlement (MoS) an ziah ah hian Mizoram Sawrkar aiawhin Home Department changtu Secretary David Lalthantluanga IAS chuan a hming ziakin Hmar People’s Convention-Democratic (Lalhmingthanga Sanate’s Faction) aiawhin an President Lalhmingthanga Sanate chuan a hming a ziak bawk a, he hun hi Adviser to Chief Minister (Political) Lalmuanpuia Punte MLA leh Rodingliana Chawngthu IPS, DIG (Northern Range) ten hmanpuiin thu an sawi bakah Stephen Lalrinawma, Sr. Superintendent of Police, CID (SB) chuan report a pe bawk a ni.

Mizoram sawrkar aiawha thusawitu Home Secretary David Lalthantluanga chuan Mizoram in remna leh muanna kawnga rahbi thar kan kai chu a lawmawmin a hlu takzet tih sawiin, “HPC hi kum 1986-ah a piang a, kum 1994-ah remna thuthlung ziahpui an ni a, kum 2018-ah HPC atanga peng chhuak HPC (D) te nen inremna thuthlung ziah a ni leh a, Vawiin-ah peng dang leh HPC-D (LF) te nen inremna ziah a ni leh a, Mizoram-a ralthuam keng hel pawl an awm tawh lo chu a thlamuanthlak hle a ni,” a ti a. Mauchar khaw daiah HPC-D (LF) te awm lailawkna tur ‘Peace Camp’ siam a nih thu sawiin, April ni 30, 2026-ah silai tun (laying of arms) inkhawm neih a nih tur thu a sawi a, Lalhmingthanga Sanate leh a pawl ten silai chelek tawh lova nunphung pangngai zawm tura an rawn chhuak chu a lawmawm takzet tih a sawi a, remna tluantling a awm theihnan duhsakna a hlan a ni.

He hunah hian HPC-D (LF) President Lalhmingthanga Sanate pawhin kum 33 chhung an rammu tih sawiin, “Inremna thleng tur hian thil tam tak an chân a ni,” a ti a. Chief Minister Lalduhoma, Home Ministet K. Sapdanga, Adviser to CM (Political) Lalmuanpuia Punte bakah Home Department Official te chungah lawmthu a sawi a, an duhthusam ang tak inremna chu a ni lo chungin lungawi tawn theihna tur thil a ni chu lawmawm a tih thu a sawi a, Hmar tlangdung hmasawnna tur Mizoram sawrkarin a ngaihsak dawn a ni tih rinna nen nunphung pangngai zawm turin an rawn chhuak tih sawiin, anni lam pawhin inremna thuthlung tihlawhtling turin theihtawp an chhuah dawn tih a sawi bawk.

Mizoram sawrkar chuan Mizoram chhunga ralthuam keng chi bil hel pawl la awmchhun nia hriat HPC-D (LF) te hi 2024 kum laihawl atangin a dawr tan a, September ni 20, 2024 khan Silchar Mizoram House-ah inbiakna hmasa ber neiin October ni 10, 2025-ah Assembly Speaker Lalbiak-zama Pisa-ah inbiak vawi 2-na neih leh niin hetah hian an thilphut (charter of demand) an rawn pharh a. Hemi hnu hian Home Minister kaihhruai Committee lian din a ni a, October ni 28, 2025 khan thutkhawm nei lehin inbiakna neih tawh dan thlirho niin HPC-D (LF) te demand sawiho a nih bakah Mizoram sawrkar duhdan te sawifel a ni.

December ni 1, 2025 khan Aijal Club-ah inbiak vawi 3-na nei lehin Mizoram sawrkar duhdan te hrilhhriat an ni a, December ni 2, 2025-ah HPC-D (LF) te hian Mizoram sawrkar duhdan an pawm thu leh anmahni lam thilphut thenkhat ziakin Home Department-ah an thlen a, Official Level-ah indawr chhunzawm zel niin, March ni 30, 2026 khan Adviser to CM (Political) Lalmuanpuia Punte Pisa-ah inbiakna hnuhnung ber neih a ni a, April ni 9, 2026 khan Home Minister hova Official pawimawh kalkhawmten uluk takin an thirho hnuah ruahmanna siamin inremna ziah a ni ta a. Tun thla ni 30-ah HPC-D (LF) mi leh sa 43 te chuan an ralthuam an tung dawn a ni.