Aizawl-ah World Homeopathy Day hman a ni

World Homeopathy Day chu khawvel hmun dang rualin nimin khan Aizawl-ah pawh Chanmari YMA Hall-ah hman a ni a, Homeopathy in kawng tinrenga hma a sawn theih nan a Research pawimawhna te zirho a ni.

Kumin-a World Homeopathy Day-ah hian thupui atan ‘Homoepathy for Sustainable Health’ tih chu hman niin Ayush Medical Officer Dr. Ruthi Laldingpuii MO chuan Homeopathy lo pianchhuah dan leh mihring hriselna atana a pawimawh leh tangkai dan te, Mizoram-a an dinhmun tlangpui leh World Homeopathy Day lo chhuah dan leh Homoepathy chungchang a hriattur pawimawh hrang hrang te an sawi a ni.

He huna tarlan a nih danin Mizo zingah Homoeopathic Doctor, Bachelor of Homeopathic Medicine and Surgery (BHMS) zirchhuak mi 256 leh Post-Graduate zir zo tawh mi 10 leh Ayurvedic pakhat awm mekin, Mizoram sawrkar hnuaiah mi 19 an thawk mek a. Homeopathy Doctor te hi Mizoram chhunga District Hospital zawng zawng leh CHC leh PHC thenkhatah te rawn theiha an awm bakah Health & Wellness Centre, AYUSH in a enkawl bik Centre 41-ah te inentir theih reng a ni a, a mamawh te hnenah a thlawnin damdawi chi hrang hrang pawh semchhuah thin a ni bawk.