Mizoram-ah eirawngbawlna Gas dinhmun thain mipuite tan chi-aina tur a awm lo tih IOCL in an sawi

Indian Oil Corporation Ltd. (IOCL) chuan tun dinhmunah Mizoram-a eirawngbawlna Gas pekchhuah kawngah harsatna a awm loh thu an sawi a. Mizoram-a Digital Mode hmanga LPG Refill booking chu West Asia-a indona a chhuah hnuah a pun thu an sawi bawk.

Indian Oil Corporation Ltd. (IOCL) hotute hian nimin khan Aizawl-a I&PR Auditorium-ah Press Information Bureau (PIB) leh Directorate of Information and Public Relations (DIPR)-te nen tangruala thuthar thehdarhtute kawmin West Asia-a Indona vanga khawvel hmun hrang hranga LPG vang leh harsa anga sawi chuan Mizoram-ah engmah nghawng a nei lo tih mipui ten chiang takin hria se an duh tih an sawi a. Chutih rualin Gas chah dan phung felfai zawk kalpui a nih theih nan te, Gas bo thlau a awm lohna tur te leh Gas-in a neitu dik tak hnen a hun taka a thlen theihna turte a hmalakna avangin mipuite chu ch-iai mai lo turin an ngen nghal bawk a ni.

IOCL hotute chuan tun dinhmunah Mizoram-ah hian chhungkaw 2,97,000 hnenah nitin Gas bur 8000 chuang chatlak lovin an pechhuak reng tih sawiin, hei hi Indo hma pawha thil awmdan reng a nih thu an sawi a. Mipuite chu uar leh zuala SMS leh IVRS hmanga digital booking hmang tura sawmin, Delivery Authentication Code (DAC) chu tun hma lam zawng aiin a pawimawh lehzual tawhin, hemi tel lo chuan Gas bur khat mah pekchhuah theih a nih tawh meuh loh thu an sawi a. IOCL leh Mizoram sawrkar tanrualnain, State pumah Black Marketting leh Hoarding-te dapchhuaka a tul anga hma la tur pawl hrang hrang pawh din an nih thu an sawi bawk a. LPG semchhuaktute leh semchhuah a nihdan mumal taka chhinchhiahna pawh kalpui zel a ni tih tarlangin, mipuite chu chi-aina tur engmah a awm lo tih hre reng turin an chah a, Gas bur lo chhekkhawl chiam emaw, Distributor-te tana phurrit siamsak zawng emaw a awm lo hram turin mipuite chu an ngen bawk a ni.

IOC hotute chuan Gas booking tih chungchangah Customer te chu Refill Booking atan Online hmang tura fuihin, tun dinhmun ah Digital Mode hmangin Booking 25000 vel an dawng tawh tih an sawi a. IOC Official Vanlalvuta Chinzah chuan Mizoram-ah Digital Mode hmanga Gas Refill tura booking chu zaa 80 atangin indona chhuah hnuah zaa 88-ah a pung tih a sawi a, Mobile signal awm miah lohna khua te a la awm avangin Gas book lamah harsatna an tawk tih sawiin, mipuite mamawh anga Gas semchhuah a nih theih nan Checkgate thenkhat ah te Cylindar lo dil thin lo se a ti bawk.

Tun dinhmunah Mizoram-ah LPG distributor 60 awmin chhungkaw 2,97,000-a mi 3,74,323 ten eirawngbawlna Gas an hmang mek a ni.