CYLA ramri lung phun thiat tura thu pe turin ngen

Chakma Autonomous District Council (CADC) huamchhunga khawtlang huap pawl hrang hrang chuan Parva-I a Central Young Lai Association (CYLA) in ramri lung an phun chungchangah Larsap chu a rang thei ang bera inrawlh turin an ngen.

CADC-a khawtlang huap pawl hrang hrang- Central Young Chakma Association (CYCA), Mizoram Chakma Students’ Union, Chakma Mahila Samiti, Teachers’ Association, Employees’ Association leh pawl dang aiawhte chu tun thla ni 18-a an thurel bawhzuiin nimin khan Larsap chenna Lok Bhawan-ah an kal a, kumin February ni 13-a CYLA-in Parva-I ah phalna nei lova ramri lung an phun chuan hun rei tawh tak atanga Lai leh Chakma hnamte inlungrual taka an lo chen ho thin chu a nghawng chhiat theih avangin hemi chungchangah hian Larsap chu a rang thei ang bera inrawlh turin an ngen a ni.

CADC-a khawtlang huap pawl hrang hrang aiawh thukhawm te chuan Chakma Autonomous District Council (CADC) leh Lai Autonomous District Council (LADC) inrina chu Pawi-Lakher Region (Re-Organization) Order, 1972-ah chiang taka sawifiah a nih thu sawiin, hetah hian an inrina chu Sanghatuilo Lui atanga Tuichawng Lui infinna thleng a nih thu an sawi a, Parva-I, Parva-II, Parva-III, Bundukbanga, Gavasury, leh Siminesora te chu CADC huamchhungah a awm tih an sawi bawk.