Aizawl Municipal Corporation (AMC) Inthlanpui Vawiin-ah neih a ni dawn ta

Aizawl Municipal Corporation (AMC) Inthlanpui chu Vawiin hian neih a ni dawn ta a, he Inthlanna a Duty turte pawhin nimin khan an Duty-na tur hmun an thleng kim tawh a ni.

AMC Inthlanpui neih tur atan hian inbuatsaihna engkim peihfel a ni tawh a, he inthlanna hi Ward 19-ah neih tur niin he Inthlanna a Duty tur Polling Official te chuan nimin khan Inthlanna atana hman tur lehkha pawimawh leh Vote thlakna khawl te chu nimin khan Aizawl Lammual atanga lachhuakin heng te hi endik nawn leh a nih hnuah nimin vek khan an Duty-na tur hmun an pan a, State Election Commission ruahman danin AMC Ward 19-a inthlanna neih tur ah hian Polling Station 259 ruahman niin hei bakah hian Auxiliary Poling Station 5 ruahman tel niin nimin khan an duty-na tur hmun an thleng fel a, nimin vek khan Polling Party te hian Polling Station-a tihtur tul te tifel nghalin, an area theuhva Polling Agent te nen Vawiin-a felfai tak leh tluang taka vote thlak a nih theih nan inkawmhona an nei a. Nimin-a Polling Party fehchhuak te bakah hian a tulna hmun leh huna tirhchhuah theih tur Reserve Polling Team pawh 20% an la awm bawk a ni.

Ruahman lawk ang chuan AMC Inthlanna atan hian tukin dar 7:00 atanga tlai dar 5:00 thleng hian Vote thlakna hun hawn a ni dawn a, he Inthlanna neih turah hian Vote thlak tur ten kim taka Vote an thlak theihna turin Aizawl Municipality huamchhungah Vawiin hian Public Holiday-ah puan a ni a, hei vang hian AMC huamchhunga sawrkar Pisa, zirna In leh Public Sector hrang hrangte Pisa khar a ni anga, Polling Station hrang hrangah hian Vote thlak hun hi tlai dar 5:00 thleng hawn tura ruahman niin hemi hun chhunga Vote thlak hman lo zingah Polling Booth chhunga awm, Polling Personnel ten Queue Slip an pekchhuah tawh te chu tlai 5:00 a pelh pawhin vote an thlak chhun zawm thei dawn a ni.

Tarlan tawh angin tun tumah hian AMC-a Ward 19-ah Inthlanna hi neih tur niin ZPM, MNF leh Congress te chuan heng Seat 19 te hi chuh vekin BJP chuan Ward 11-ah inthlan hi an chuh bawk a, a vaiin candidate mi 68 awmin AMC huamchhungah hian Vote nei mi 2,37,846 awmin heng te hi mipa 1,09,376 leh hmeichhia 1,28,470 an ni a. Kum upa leh rualbanlo te tana Home Voting buatsaih ah Vote 2594 tla tawhin Election duty te puala Vote thlakna siamah Vote 1328 a tla tawh bawk a. He inthlanna a Vote tla te hi tun thla ni 27 khian a ruala chhiar tur a ni ang.