Mipui tam zawk banphaka MUHCS siam an duh thu Mizoram Transformation Movement in an sawi

Mizoram Transformation Movement (MTM) chuan Mizoram Universal Health Care Scheme (MUHCS) chu mipui tam zawk banphak a siam nise an duh thu an sawi.

Inrinni-a thu-chhuah an siamah Mizoram Transformation Movement (MTM) chuan Mizoram Sawrkarin mipuite damloh nikhua a inenkawlna senso a tum sakna Health Care Scheme (MUHCS) a siam chu a thain lawmawm an tih thu sawiin, tun thlengin hmang tangkaitu pawh tam tak an awm tawh thu an sawi a. Chutihrual chuan MUHCS chu mipui tam zawk banphak a awm theihna turin harsatna la awm leh a chinfel dan tur nia an ngaih te an tarlang a. Mizoram-a Private Hospital tha leh lian tam berah MUHCS hi hman theih a la nih loh avangin damlo tam tak, heng Hospital a loh theih lohna avanga luh ngai te tan MUHCS hi hman theih a ni lo tih tarlangin, “Mizoram-a Private Hospital Empanelled lohah te damlo an luhin bill theih lova a awm hi a dik lo a. Mizoram Health Care Society in Empanelled Hospital list a tihchhuah ah hian ‘Deemed Empanelled’ Hospital - Cashless hman theih lohna, MR bill theihna chauh Hospital list a dah ah hian Silchar-a Hospital te, Shillong-a Private Hospital: Woodland Hospital, Bethany Hospital leh Nazareth Hospital te, Guwahati-a Downtown Hospital pawh an tel a. Hnamdang Private Hospital zawka tih theih si, Mizoram entreprenuers ten an siam Private Hospital a phal a ni ve lh hi a dik lo hlein kan hria a, sawrkar hian rang takin ngaihtuah tha leh se kan duh a ni,” an ti.

Damlo zinga Emergency-a empanelled loh Hospital-a lutte chu an bill leh thei ang tih a nih rualin an bill theih a tlem em em tih pawh tarlangin, hmun thuma thena hmun khat pawh a bill theih mang loh nia sawiin, hei hian MUHCS-a inziahluh a ti manhla lo hle tih an tarlang a. “Emergency a Non-Empanelled Hospital a luh ngai ten an bill lehin an bill theih tlem lutuk hi ennawn leh hram nise, an bill atanga a chanve tal an hmuhlet leh theihna turin sawrkar hian hma la rawh se,” an ti bawk.

Mipui mimir in hetianga harsatna kan tawh mek lai hian kan ram hruaitute - MLA leh Ex-MLA te chuan MUCHS-ah hian contribution pe ve mah se MUHCS hi an zawm ve lo niin MTM chuan sawiin, “Anni chuan eng Hospital ah pawh, Empanel loh Hospital - ram chhung leh ram pawhah pawh lut se an damloh inenkawlna senso zawng zawng hi an bill vek thei a ni,” an ti a. “Kan ram hruaitute, MLA leh Minister te, Ex-MLA te hian MUHCS hi a tha hle a an hria anih chuan MUHCS hi zawm ve ngei se, damlo mangang leh chhungkaw harsa tam takin an bill theih lohna Hospital a awm angaih si lai hian annin an duhtawka an lo bill thei hi a dik tawk lo hlein kan hria. Ram hruaitute an nih angin mipui tan entawn tlak leh hmahruaitu zawk ni turin kan beiseiin kan ngen bawk a ni,” an ti bawk a. Heng bakah hian Pensioner leh Sawrkar hnathawkte harsatna te chu chinfel sak an tul thu te pawh an sawi bawk a ni.