Kum 21 chhunga Chhiah hmuh tam ber kum a thleng

Mizoram sawrkara Taxation Department-in sawrkar kum liam ta, 2025-2026 chhunga Chhiah a hmuh zawng zawng chu Rs. 12,78,55,13,765 a tling a, hei hi kum 21 chhunga chhiah hmuh tam ber kum a ni.

Taxation Department tar landanin, kum liam ta 2025-2026 chhunga chhiah hmuh Rs. 12,78,55,13,765 zinga Rs. 9,31,62,76,931 chu GST atanga hmuh a ni a. Profession Tax atangin Rs. 17,00,64,331 hmuh ni bawkin, Sales Tax atangin Rs. 2,38,53,23,620, Road Maintenance Cess atangin Rs. 45,65,46,042, Entertainment Tax Rs. 70,000 leh Chhiah hmuhna dang atangin Rs. 1,13,650 hmuh a ni a. Taxation Department hian kum 2024-25 chhung khan chhiah chi hrang hrang atangin Rs. 11,49,81,88,170 an hmu.

Sawrkar kum kalta chhung khan April, 2025-ah chhiah hmuh tam berin hemi thla hian Rs. 1,79,51,94,242 hmuh a ni a, sum hmuh tlem ber thla, August, 2025-ah Rs. 73,85,45,328 hmuh a ni a Kum 2025-2026 chhunga Chhiah hmuh Rs. 12,78,55,13,765 hi kum 21 chhunga Taxation Department in Chhiah hmuh tam ber kum niin, kum 20 liam ta 2005-2006 a Taxation Department in chhiah a hmuh zat chu Rs. 45,95,99,733 a ni.

Taxation Department-in chhiah an hmuh that theih nan kawng hrang hrangin hma an la tih Commissioner of State Tax HK. Lalhawngliana chuan a lo sawi tawh a, Commissioner of State Tax chuan nikum September atanga hman tan, GST rate thar hman hnuah rate thar zawm tha lo pawisa chawitir mi engemaw zat an neih tawh thu leh chung mite pawisa chawi chu cheng nuai 10 chuang a tlin tawh thu a lo sawi tawh bawk.