AMC Inthlanpui neih tur atan inbuatsaih fel niin naktuk zing dar 7:00-ah Vote thlak tan a ni ang

Naktuk April 21, 2026-a Aizawl Municipal Corporation (AMC) Inthlanna neih tur atan inbuatsaihna peihfel a ni tawh a, nimin tlai dar 4:00 khan Campaign theih hun pawh tawp tawhin naktuk zing dar 7:00 atanga tlai dar 5:00 thlengin Corporator thlangin Vote thlak tur a ni ang.

Naktuk-a AMC Inthlanpui neih tur atan hian State Election Commission chuan nimin tlai dar 5:00 atanga naktuk tlai dar 5:00 thleng ‘Silent Period’ ah puangin State Election Commissioner Dr. H. Lalthlangliana chuan, Vote thlaktu ten tuma chim buai loh a zalen taka rilru an hman theih nan ‘Silent Period’ hi puan a nih thu a sawi a, “Political Party te tan hun rei tak campaign-na hun hawn a ni tawh a, vote thlak dawn hnaite hi chu Voter te chanpual, an duhthlanna felfai an siam theihna atana inbuatsaih hun anih avangin Voter te chanvo liau liau a ni,” a ti a. He hun hi ti buaia campaign tum talh chu dan bawhchhiatna a nih bakah Voter-te zahlohna a ni tih sawiin, Voter-te pawhin anmahni hmin tuma la campaign ru fo te chu Voter te zahlohna, anmahni ngaineptu an ni tih hrethiama an lo dawnsawn loh thiam angaih thu a sawi bawk a ni.

State Election Commissioner chuan he inthlanna a Duty tur Polling Party zawng zawngte chu Vawiin-a an Duty-na tur hmun pan turin an inruahhman fel vek tawh tih sawiin, Ward 19-a Polling Station 257-ah Electronic Voting Machine (EVM) hmanga vote thlak a ni ang.

Tun tum AMC Inthlanna neih turah hian Vote nei mi 2,39,989 awmin an zinga 1,29,656 chu hmeichhia niin mipa 1,10,333 an awm bawk a, Vote nei zingah mipa aia hmeichhia an tamna chu 19,323 a ni. Vote awm tamna ber chu Ward No. XVIII-na niin vote nei 18,906 an awm a, Vote nei tlemna ber Ward No. VIII-ah vote nei mi 7,975 an awm thung.

Tun tum Inthlanna ah hian ZPM, MNF leh Congress party te chuan Seat awm zawng zawng Seat 19 chuh vekin BJP chuan Seat 11 an chuh bawk a, a vaiin Candidate 68 an awm dawn a ni.