Lengpui ram laka eirukna lian ber niin sawi

Mizoram Pradesh Congress Committee (MPCC) chuan Lengpui ram lak a nih avanga cheng Vbc. 117 insemna awm anga lang chu Mizoram a eirukna lian ber niin an sawi.

Nimin-a Aizawl Press Club-a thuthar thehdarhtute an kawmna ah MPCC General Secretary Dr. Lallianchhunga chuan Compensation hmanga Indian Air Force te tana Lengpui ram an lâk a dan chungchangah Dan bawhchhiatna nasa tak a awm nia sawiin, Congress party chuan an ngai thutak hle tih a sawi a, “Mipui pawisa tam tham tak, nuai 11790 chuang insemtu an awm ngei a ni tih hi Mizoram mipui rin dan a nih avangin Feb. 5,2026 khan CBI Aizawl Unit hnenah pawh hemi chungchang hi chhui ngei turin First Information Report (FIR) kan thehlut tawh bawk a. Heti khawpa kil hrang hrang atanga ZPM sawrkar kan nawr chung hian ZPM sawrkar hotute zingah a hlawkna têl vetu an awm nge, ZPM sawrkar chu insawifihlim tumin tan ala khawh char char a ni,” a ti.

Dr. Lallianchhunga chuan IAF in Lengpui ram an lei theih nana diklo taka thil ti ah Chief Minister Lalduhoma leh Revenue Minister B. Lalchhanzova chu puhin, Feb 21, 2025 khan Chief Minister chuan IAF in Lengpui ram lei an tum chungchang hi 'tihtawp lailawk'a nih thu a sawi tuk lawkah chak taka file kal tir turin Revenue Minister B. Lalchhanzoa'n phalna a pe nghal niin a sawi a. Ram hralhna mantang eitu Henry Lalremsanga Hlawnmual kuta cheng vbc. 117 a luh theih nana ZPM sawrkar in hma a la duh chu mipui in mak an ti nia sawiin, “Ram lei khawmtu Pu Rohmingliana’n cheng nuai 7000 a dawn laiin, a ram neitu pawh ni lo Pu Henry Lalremsanga Hlawnmual in cheng nuai 11790 chuang a dawn theih nana ZPM sawrkar thil tih dan hi engti zawng mahin sawi mam theih a ni lo,” a ti a. Congress chuan hemi chungchang ah hian hma an la zui zel tih a sawi bawk.