MUHCS-ah mipui te an thla a muang niin sawi

Health Minister Lalrinpuii chuan, “Mizoram Universal Health Care Scheme (MUHCS)-ah hian mipui te an thla a muang a ni,” a ti.

Nimin-a Aizawl khawpui chhunga ZPM Party in Street Campaign an neih ah Health Minister Lalrinpuii chuan ZPM in sawrkarna an chan atangin Health lamah theihtawp an chhuah thu sawiin, “Kan Sawrkar hi mipuite nat rual a na ve thin kan nih angin Mizoram Universal Health Care Scheme pawh mipuite thlamuanna khawp pe thei turin kan siam chhuak ta a ni,” a ti a. Sawrkar hnathawk awm lohna chhungkaw tan pawh thlaphanna awm tawh lohna tur Health Care Scheme kan nei tawh nia sawiin, “Mipui Sawrkar chuan a damlo apiang te tan manganna a tireh tawh,” a ti a. MUHCS avangin Sawrkar damdawi In hrang hrangte an thuamtha mek zel tih pawh sawiin, “ZMCH-ah tunhma a ICU khum 13 awm thin kha khum 26 lai mai kan nei ve thei ta tih a sawi a. Tunhnaiah sawrkar damdawi In te tih changtlun zel a nih thu sawiin, “Tunhnai a Bio Fire khawl kan neih te pawh natna hmuhchhuah harsa bik zawnna khawl a ni a. MUHCS-ah hian mipui te an thla a muang a ni,” a ti bawk.

Health Minister chuan MUHCS chu Kohhran pawhin a rintawk avanga thuchhuak an siam laia Opposition Party MPCC ten Press Conference meuh ko a 'MUHCS rintlak a ni lo (Health Scam)' ti zawnga thuchhuah an nei duh chu Kohhran leh Mizoram mipui zahlohna lian tak niin a sawi a, “Mizoram mipuite hi Lem ang der theih pawh kan ni tawh lo tih lo hria se ka duh a ni. Tin, Empanelled Hospital te pawn bill an dawn that zia an sawi a, Private Hospital hrang hrang Empanelled tura dilna pawh kan dawn belh zel bawk a ni,” a ti.

Mizoram Sawrkar chuan MUHCS-ah hian bill a neih ang ang chu a pe zel tih pawh Health Minister chuan sawiin, “Thawktu lam indaihlohna avanga process lai mek pawh a awm ang, Sawrkar hian bill pek tur hi a nei a, thlaphanna tur a awm lo a ni tih ka sawi duh bawk a ni. MUHCS hi Scheme langtlang a ni. Empanelled List, Bill pek tawh zat, Guidelines, Circular leh Notification etc. zawng zawngte State Healthcare Society Website lamah a duh apiang tan en theiha dahchhuah a ni a. Mass Media leh Social Media lamah Bill pek dan te, Scheme tana pawisa lut leh chhuak te langtlang taka tarlan thin a ni a. MUHCS atana rate hman mek ‘Master Package rate’ te hi a duh apiang tana en theih tura MSHCS website leh H&FW Department Website-ah te dah a ni. Private Hospital hrang hrang dinhmun in anglo tak tak, that dan inanglo tak tak, Facility neih inanglo tak takte nena inremna bik, Commercial Confidential Secrets kaihnawih thil hi chu MoU ziahnaah ‘Confidentiality clause’ a awm tlat avangin pua zar a rem lo a ni,” a ti bawk.