MUHCS 2.0 atan inziahluhna hun hawn mek niin tunkar Nilaini thleng inziahluh theih a ni ang
Mizoram sawrkarin Health Care Scheme a kalpui mek thawhhnihna, MUHCS 2.0 atan hian kumin February ni 16 atang khan Mizoram sawrkar chuan internet kaltlanga inziahluhna hun a hawng tan a. Internet thatlohna khua bikah chuan Sub-Centre leh hmun remchangah inziahluhna tur sawrkarin a ruahman bawk a. Mahni-a Online hmanga inziahluh harsat te tan Sub-Centre tina Health Worker ten an tihsak thei bawk a ni. April 1, 2026 atang khan MUHCS 2.0 hi hman tan a ni leh tawh a, MUHCS 2.0 hi mipuiin an zawm theih nan Kohhran hrang hrang pawhin hma lain Mizoram UPC leh Mizoram Presbyterian Kohhran te chuan an Kohhran mi inziaklut an tam theihna tur hian hma an la tawh a ni.
Hetihlai hian kum 2025-26 chhung khan Mizoram Universal HealthCare Scheme (MUHCS) hnuaiah mi 6,63,934 an inziaklut a, an zinga mi 20,198 te chu mi nawlpui man chawia inziaklut, Contributory beneficiary te an ni a. Akashvani News Aizawl thudawn danin, kum 2025 April thla atanga kumin 2026 January thla inkar khan MUHCS hnuaiah mi nawlpui (Contributory beneficiary) te thawhkhawm zat chu Rs. 6,54,59,899 niin an inenkawlna senso sawrkar in a pek zat chu Rs. 37,46,41,412 a ni.
Hemi hun chhung vek hian AB-PMJAY Golden Card siam mi 5,98,175 awmin an inenkawlna bill sawrkarin a pek zat chu Rs. 60,79,31,231 a ni a. Sawrkar hnathawk inziaklut mi 35,325 niin an hlawh atanga Contribution tlingkhawm zat chu Rs. 16,77,58,200 a ni a, an inenkawlna bill sawrkarin a pek zat chu Rs, 43,81,60,957 a ni a. Pensioner inziaklut mi 10,236 awmin, an thawhkhawm zat chu Rs. 8,51,51,010 a ni a, an inenkawlna senso Bill zat chu Rs. 29,49,97,717 a ni bawk.
Comments
Post a Comment
I ngaihdan i sawi hian mipui ngaihdan i tarlang a ni!