AMC Inthlanpui atan Campaign theih hun a tawp ta

Naktuk-a Aizawl Municipal Corporation (AMC) Inthlanna neih tur atana Campaign theih hun chu nimin tlai dar 5:00 khan a tawp ta a, Party tam ber te chuan Inrinni khan Campaign kharna neiin mipuite chu an Candidate te Vote theuh turin an sawm a ni.

AMC-a rorellai MNF Party chuan Inrinni khan Aizawl Press Club-ah thuthar thehdarhtute kawmin Khawpui nuam leh thianghlim din turin an inbuatsaih thu leh AMC inthlan lo awm turah Pathian leh mipui zarah hlawhtlinna an chan ngei an inbeisei tih an sawi a. AMC Inthlan lo awm turah hian Mizoram khawpui sawn duh leh duhlo buk a nih dawn thu te, Leiba sal-ah Zoram a tan mek thu te, sawrkar in sum an tih lapse nasat thu te, ZPM sawrkarah Eirukna leh Hlemhletna a hluar thu leh Chhiah leh bill pung nasa in mipuiah erawh sum a vang nia sawiin, chhan hrang hrangte avangin MNF in tlin an inbeisei thu a sawi bawk a ni.

ZPM pawhin Inrinni khan Aizawl Press Club-ah thuthar theh-darhtute kawmin ZPM Media Chairman B. Lalchhanzova chuan AMC ah an sawrkar chuan mipuite chhawr theih tur asset lian siam kawngah nasa taka hma an lak tur thu a sawi a. Mizoram Municipalities (Ammendment) Act, 2015 Section 75 (A) in a sawi anga khawpui chhunga mi retheite tana sum dah thin chu a taka hman a nih dawn thu te, Bawlhhlawh paih dan ennawna hmalak an tum thu leh Solid Waste Management Centre tihchangtlun an tum thu a sawi a. Inchhawng tinin LSC ang chi an neih theih nan Apartment Rules chu Assembl-ah pulutin an remtih chuan chak zawka hma lak an tum thu leh ‘Aizawl First’ ti-a ro an rel dawn thu te a sawi.

Congress Party pawhin MPCC Treasurer Dr. Lalmalsawma Nghaka hova thuthar thehdarhtute kawmin Aizawl khawpui chu Zofate Jerusalem a nih angin a enkawltu tur mipuiten an thlan turah Congress party chuan mipuite lal ber se an duh thu a sawi a. Party dangte aia Congress party danglamna pakhat chu, lainatna nen dan an kengkawh thin nia sawiin, Tuna AMC Dan hmanlai tam takah hian mipuite tan harsatna a tam hle tih a sawi a, mipuite chhawk zangkhai tur zawka ngaih AMC chu mipuite tan phurrit a nihna a tam hle tih sawiin, AMC-ah hian Pathian leh mipuite zara chakna an chan chuan mipuite chhawk zangkhai zawk tur, mipuite phurrit ni lo tur AMC din an tum tih a sawi bawk.

BJP chuan Inrinni khan Aizawl-ah Street Campaign neiin an President Dr. K. Beichhua chuan Aizawl khawpui changkang leh thianghlim, khawpui hrisel, mipui harsatna ata khai chhuak thei tur BJP Candidate te Vote turin mipuite a sawm a. BJP din chhan ber chu 'Development' - hmasawnna hi a ni tih sawiin, Aizawl hmasawn nan te, Mizoramin hmasawnna tak tak a neih nan te BJP Sawrkar a mamawh hle tih te a sawi bawk a ni.