'From Guerrilla Fighter to Chief Minister' tlangzarh

MNF President leh Chief Minister hlui Zoramthanga’n ama chanchin a ziahna 'From Guerrilla Fighter to Chief Minister' chu nimin khan Larsap General (Rtd) Vijay Kumar Singh chuan a tlangzarh.

Aijal Club-a he lehkhabu tlangzarhna hunah hian Larsap General (Dr) Vijay Kumar Singh chuan 'From Guerrilla Fighter to Chief Minister' tih lehkhabu chu mimal chanchin ziahna mai ni lo, Mizoram history leh politics hriatchian nana tangkai tak, a ziaktu ngei tawnhriat atanga buatsaih, Mizoram hun tawn pawimawh tak chungchang tarlanna a nih thu a sawi a. Lehkhabu chu rambuai lai atanga mipui sawrkar hnuaia mawhphurhna leh hruaitu dinhmun pawimawh tak thlen dan chanchin tarlanna anih tih sawiin, he lehkhabu hian inbiakna, inhriatthiamna leh tumruhna hmangin harsatna te a chinfel theih tih a lantir thu a sawi a. A ziaktu Chief Minister hlui Zoramthanga taimakna fakawm a tih thu sawiin, inzir mi anihna chuan hlawhtlinna tam tak a pek thu leh tum chuan kawng a awm tih a taka a entir thu a sawi bawk.

Larsap chuan Mizoramin chanchin danglam bik a neih thu sawiin, Zoramthanga lehkhabu ziah chuan Mizorama thil thleng inlumlet dan fiah taka a thailan thu leh a ziaktuin ama tawnhriat ngeite hmanga thil thlen dante a lo chhinchhiah thlap mai chu fakawm a tih thu a sawi a, “Hei hian thangtharte hnenah rambuai awmzia bakah zalenna leh mipui rorelna hlut zia a hriat thiam tir thei dawn a ni,” a ti a. Thalai, zirlai, zirbing mi, dan siamtute leh mipuite'n tangkai taka an hman ngei a beisei thu a sawi bawk.

Lehkhabu ziaktu Chief Minister hlui Zoramthanga chuan 'From Guerrilla Fighter to Chief Minister' lehkhabu tlangzarh a ni ta chu a tan thil chhinchhiah tlak tak anih thu sawiin, kum 50 lai diary tha taka a vawn that chu thulak nana a hman thu leh lehkhabu chhunga thil thleng a tarlante chu amah ngei a tel vena deuh vek a nih thu a sawi a. Lehkhabu khawr pum anih theih nana buaipuitu zawng zawngte chungah lawmthu sawiin, Mizote mai bakah hnam dangte pawhin Mizo chanchin an hriatchian lehzual nana tangkai taka hman anih ngei a beisei thu a sawi a. Larsap nena an intawn dan inpersan tak pawh he hunah hian sawi chhuakin, inhre miah lova December ni 16, 1971-a East Pakistan War laia lo inep tawh, khatih laia Indian Army-a Lieutenant, tuna Mizoram Larsap ni ta General (Dr) Vijay Kumar Singh-a’n a lehkhabu a tlangzarh chu mak dangdai a nih thu a sawi bawk.

Zoramthanga lehkhabu chhut saktu Penguin Random House of India hi khawvel puma publisher lian ber niin MNF President chu hun harsa tam tak paltlanga damchhuak zinga mi chhuanawm anih avangin tihchhuah sak ngei an duh thu an sawi a, Lehkhabu hi Amazon-ah lei theihin a awm a, Aizawl-a tlangzarh hnuah dawr hrang hrangah zawrhchhuah a ni bawk anga. Phek 430 a chhah niin, Bu khat hi Rs. 400/- man a ni.