‘Tuichangral Games 2026’ hawnna neih a ni

Tuichangral Games & Sports Association (TGSA) buatsaih ‘Tuichangral Games 2026’ chu nizan hmasa khan Khawhai Town Hall-ah Sports Minister Lalnghinglova Hmar chuan a hawng a, tun thla ni 13 atanga 22 chhung hian infiamna hrang hrangah khaw hrang hrangte an inel dawn a ni.

‘Tuichangral Games 2026’ hawnna inkhawm ah hian Sports Minister Lalnghinglova Hmar chuan Tuichangral Games chu GSA leh mipui tangrualin an buatsaih a nih avangin a ngaihlu hle tih sawiin, Sports Minister dinhmun a luah tirha a tih hmasak ber pakhat chu Tuichangral leh Tuipuiral Games tihmasawn tura hmalak a nih thu a sawi a. Tuichangral mipuite'n Games chu lo ngaihlu sauh sauh tur leh a bikin kum naupang zawk tana Olympic Sports discipline-a inelna buatsaih thin chu ngai thutak zel turin a chah a ni.

Sports Minister hmalakna-in kum 2025 atangin Tuichangral Games leh Tuipuiral Games-ah te naupang zawk tan Olympic Sports discipline-ah inelna buatsaih thin a ni a. Kumin Tuichangral Games-ah pawh hian Mizoram State Sports Council (MSSC), Sports Association leh Tuichangral GSA-te tangrualin kum 16 hnuailam tan Boxing, Weightlifting leh Wrestling-ah inelna buatsaih leh a ni dawn a. Inelna buatsaihna'n sawrkar atangin Aports Association-ah Rs. 1,00,000/- theuh leh Tuichangral GSA ah Rs. 50,000/- pek thin a ni a. GSA-a pek thin hi nakum atang chuan Rs. 1,00,000/- ah tihpun a nih tur thu leh Tuichangral Games buatsaihtute an inhawn chhung chuan EMS sports discipline dangah pawh sawrkarin a puih zel tur thu Sports Minister chuan a puang a ni.

Tuichangral Games 2026 hi a tum 15-na niin kum 1970 khan ‘Tuipui, Tuichangral Mini Olympic’ (TTMO) tiin infiamna hi an lo kalpui tawh a, kum 3 chhung kalpui a nih hnuah sum lam harsatna avanga chawlhsan niin, kum 1982 khan mi thahnemngai ten ‘Tuichangral Games’ hming vuahin an din thar leh a ni. Kum 12 chhung zet kalpui a nih leh hnuah sum lam harsatna avang bawkin chawlhsan a ni leh a, kum 2005 khan Tuichangral khawchhuak mi thahnemngai te zarah mi 8 sponsor-na hnuaiah neih chhoh leh a ni a. Kum 2014 khan khawchhak lam Tuipuiral nen infinin ‘Tuipui, Tuichangral Games’ tiin khawchhak lam leh khawthlang lam nen inthlen chhawkin kum 3 chhung neih a ni leh bawk a ni.

Tuichangral Games 2026-ah hian Football (Mipa leh Hmeichhia), Volleyball (Mipa leh Hmeichhia) bakah kum 16 hnuailam tan Boxing, Wrestling leh Weightlifting-ah te inelna neih a ni dawn a. He Games-in a tum ber chu India-in kum 2036 Olympic thleng tura a inbuatsaih mekah Mizo ten infiammi, India aiawh tur kan thawh ve ngei theih nan kum sawm leh paruk (16) hnuai lamah nasa taka tan lak a ni a. Kum 2036 Olympic hmathlir nei chungin Chief Minister leh Sports Minister ruahmanna-in kum 16 hnuailam tan Boxing, Wrestling leh Weightlifting pawh hi buatsaih a ni.