CBI chhui tir tum lo niin hria

Indian Airforce hnena Lengpui ram hralh chungchang chu ZPM sawrkar in CBI chhui tir a tum tak tak lo niin MNF Party chuan an sawi a, CBI in an chhui ngei theih nan hma an la zui zel dawn tih an sawi bawk.

MNF Legal Board Vice Chairman Lalpianfela Chawngthu chuan nimin khan Aizawl Press Club-ah thuthar thehdarhtute kawmin, Lengpui Land Scam CBI chhuitir tura MNF party in an nawrna, ZPM sawrkarin a bawhzui danah CBI hnena chhui phalna, Consent an pekna notification tihchhuah bak hmalakna mumal engmah zawhchhuah tur a awm lo niin a sawi a, “CBI chhuitir tumna tak tak an nei lo a, an ngam bawk hek lo a ni tih hi mipuite hriattir kan duh a ni,” tiin Assembly-in Resolution a pass ang ngeia CBI in an chhui theih nan hma an la chhunzawm zel dawn tih an sawi bawk.

MNF Party chuan Sairang Kolabari ram lak turah ZPM mi leh sa te chu sum leh pai a hlawkna umin an hmanhlel mek niin an sawi bawk a, heng bakah hian ZPM sawrkarin RTI Act an namnul hle niin an sawi bawk a. RTI hmanga zawhna chhan mai loh te, zawhna inang reng si a chhanna inang lo te a awm thin niin an sawi bawk a. Khua leh tui ten thu dik leh tha hriat chu an chanvo a ni tih sawiin, hemi kawngah hian ZPM sorkar chu a dawihzep niin an sawi bawk.