AMC Inthlanpui neih tur atana Campaign theih hun naktuk tlai-ah a tawp dawn ta

Tun thla ni 21-a Aizawl Municipal Corporation (AMC) Inthlanpui neih tura Campaign theih hun chu naktuk, April 19, 2026 tlai dar 5:00 hian a tawp dawn ta a, he inthlanna neih tur atan hian kawng hrang hrangin inbuatsaihna kalpui mek a ni.

AMC Inthlanpui neih tur chungchang ah hian nimin khan State Election Commisioner Dr. H. Lalthlangliana hovin Mizoram People’s Forum (MPF) leh Political Party aiawhte chu State Election Commissioner Pisa-ah thukhawmin Inthlanna neih tur chungchang hi an sawiho a. He hunah hian State Election Commisioner chuan thudik ziktluak lo leh tawngkam uchuak, mi rilru tina thei ang chi a Vote zawng lo turin Polictical Party-te chu ngenin, hetianga inbeihna hi Media leh Social Media-ah hmuh tur a awm zeuh teuh thin tih sawiin, an Party Worker theuhte chu thunun tura Political Party te chu a ngen bakah MPF hruaitute pawhin puibawm turin a ngen bawk.

State Election Commisioner chuan AMC Inthlanpui neih tura Campaign phal loh hun, Silent Period chu April ni 19, 2026 tlai dar 5:00 atanga Vote thlak zawh, April 21, 2026 tlai dar 5:00 thleng a nih tur thu sawiin, Silent Period chhunga Campaign chu voter te zahlohna a nih thu a sawi a, Political Party hrang hrang te chu hemi laka insum turin a ngen bawk a ni.

Vote thlakna hmun, Polling Station-a kal thei lo te tan Home Voting zawhfel a nih thu leh voter 2594 ten Home Voting hmanga vote an thlak thu State Election Commisioner hian sawiin, inthlanna muanawm, felfai leh thianghlim neih a nih theih nana theihtawp chhuah turin Political Party hrang hrang aiawh leh MPF hruaitu kalhawm te chu a sawm bawk a ni.

Karleh Thawhlehni-a AMC Inthlanpui neih tur tur atana inbuatsaihna atan hian nimin khan Sector Officer leh Polling Personnel te tana Training chu neih leh niin he Training hi Presiding Officer (PRO) leh Polling Officer (PO) te tan chuan a tawpna ber tur a ni a. He hun hi Aizawl District Election Officer (DEO) leh District Municipal Election Officer (DMEO) Er. Lalhriatpuia chuan telpuiin Democracy ramah chuan Indona tih lohah chuan Inthlanpui hi ngaih pawimawh ber a ni thin thu sawiin, AMC-2026 inthlanpui hi inthlanna felfai, thianghlim, langtlang leh tihsual awm lo (Faultless) inthlanpui a nih theih nan theitawp chhuah turin Trainees te a fuih a. Intlan buaipuitu turte chu mahni inrintawkna nena an duty an hlen theuh tura inbuatsaih turin a chah bawk,