Silsury tan Ambulance vailiam

India leh Bangladesh ramri depa awm Silsury khua, Mamit Aspirational District tana hman tur Ambulance chu nimin khan Larsap General (Dr) Vijay Kumar Singh chuan Aizawl-a Lok Bhavan atangin a vailiam a, he Ambulance hi NBCC (India) Ltd. te CSR Fund kaltlanga lei a ni.

Nimin a Ambulance vailiamna puala hun hman ah hian Larsap General (Dr) Vijay Kumar Singh chuan rualkhai taka hmasawnna kalpui turin ramdang leh State thenawmte nena inrina ah hmasawnna ruhrel siam ngaih pawimawh a tul tih sawiin, heng hmunte hi ngaihven zual a ngai a, anih loh chuan mipuite bawkin an tuar thin a ni, a ti a. Ramri dep a khaw awm Silsury-in an tangkai pui tur Ambulance tha tak NBCC te'n an pe chu lawmawm a tih thu sawi bawkin, NBCC-ah danglamna leh hmasawnna nasa tak a hmuh thu leh an thiamna leh theihna te chu Mizoram-a chengte tihhmasawn nana hman tum turin a chah bawk.

NBCC (India) Ltd. hi kum 1960-ah din niin, Ministry of Housing and Urban Affairs, Govt. of India hnuaia Public Sector Undertaking (PSU) Company a ni a. Project Management Consultant (PMC) niin, Sawrkar laipui hnuaia hmasawnna ruhrel lian tak takte an thawk thin a. Mizoram-ah chuan India leh Bangladesh ramri hung hna thawkin, thawh tur bituk an pek km 189 atangin km 98 an zofel tawh a, hmabak dang awm Lawngtlai District-ah an thawk mek a. Tunhnai khan Mamit District chhung Dampa Tiger Reserve Forest area-a ramri hung hna an zawh fel tawh km 55 a thui leh Border Outpost (BOP) 5 te chu a enkawl tur hnenah an hlan fel tawh a ni.

Nimin-a he hun hman hi Gyanaranjan Samal, CGM, Head, North East Region, NBCC chuan kaihruaiin Dampa Bialtu MLA, Dr. R. Lalthangliana pawhin thu a sawi bakah Debasish Satapathy, Executive Director (HRM) & Head, CSR, NBCC chuan lawmthu a sawi bawk a ni.