Election MCC bawhchhia a puh te thiam chantir

Aizawl Municipal Corporation (AMC) Inthlanpui neih tur kaih-hnawiha Model Code of Conduct (MCC) bawhchhiaa puh Minister pathum, MP pakhat, MLA pakhat leh AMC-a ZPM Corporator Candidate pakhat te puhna chu finfiahna a awm loh avangin State Election Commission chuan thiam a chantir.

Election Model Code of Conduct (MCC) bawhchhiaa puh mi paruk (6) te hi Agriculture Minister PC. Vanlalruata, LAD Minister C. Lalsawivunga, Supply Minister B. Lalchhanzova, Lok Sabha MP Richard Vanlalhmangaiha, Adviser to CM Lalmuanpuia Punte leh ZPM Corporator Candidate K. Lalrodinga te an ni a. Heng mite hi MCC bawhchhia a puh an nihna chungchang ah State Election Commission (SEC) chuan ziak-a insawifiah turin a ti a, an insawifiah vek bakah complain thehluttu MPCC Legal Cell Secretary H. Lalmuankima leh MNF Legal Board-a Joint Secretary Lalbiakkima te chu dan bawhchhiatna finfiahna an neih ang ang thehlut turin a hriattir bawk a ni.

Election MCC bawhchhia-a puh Minister PC. Vanlalruata leh MLA leh Adviser to Chief Minister Lalmuanpuia Punte te hi Official Car hmanga campaign-a puhna chu finfiahna rintlak tawk a awm loh avangin State Election Commission chuan thu tlinga ngai lovin a hnawl a. Hetihlai hian Republic Vengthlang, Aizawl-a Transformer dah chungchanga MCC bawhchhiaa LAD Minister C. Lalsawivunga puhna chu AMC inthlan puan hmaa thil tih nia sawifiah a ni a. Minister B. Lalchhanzova pawh Aizawl East-II huamchhung, Chhinga Veng Junction siam leh Armed Veng South Cultural Club te pui-a puhna chu AMC inthlan puan hma ni a sawi a ni bawk a, Lok Sabha MP Richard Vanlalhmangaiha pawh Republic Vengthlang leh Upper Republic te Mahindra Bolero Pick-up a pe ni a sawi pawh AMC inthlan puan hma ni a sawifiah a ni. AMC Candidate K. Lalrodinga thil tih a puh pawh engmah tih a neih loh thu a sawifiah bawk a ni.

Heng insawifiahna te hi tifiahtu tur finfiahna tarlan theih vek a nih lain, complain thehluttute hian an thusawi dikzia proof-na tur engmah an thehlut thei lova, chuvangin SEC chuan MCC bawhchhiaa puh ten finfiahna document te nena an thehluh theih vek laia complain thehluttuten an thusawi finfiahna documentary proof engmah an neih loh avangin MCC bawhchhia-a puhna te hi thu tlingah a ngai lo a ni.

Heti hian tun tuma AMC Inthlanpui lo awm turah hian State Election Commission chuan Election Model Code of Conduct (MCC) bawhchhia a inpuhna pariat a dawng ta a. A hma lamin Principal Chief

Conservation of Forests (PCCF) leh Directorate of Information & Public Relations a Director-te chu LDC hna lak chungchang ah insawifiah tir niin Advertisement tihchhuah chu cancel leh a ni bawk.