Hnam hnatlang-a thawhlawm thawh turin sawm leh

Zoram Thar Zofate Lairelna Inpui chuan Zofate Pathian Biak Inpui chu khawvel puma Zo hnahthlak Zofate a neitu an nihna angin hnam hnatlâng thawhlawm thawh vek turin an sawm nawn leh tih an sawi.

Nimin-a Aizawl Press Club-a thuthar thehdarhtute an kawmna ah Zoram Thar Zofate Lairelna Inpui chuan Thenzawl-a Zofate Pathian Biak Inpui sak mêk chungchang hi sawifiahin, Zofate Pathian Biak Inpui sak mêk chu pawl bik emaw, Kohhran pawl bik emaw, Kohhran pawl thar ta tur emaw nilovin, khawvel puma Zo hnahthlak Zofate zawng zawng ta tur a nih thu leh a hming-ah pawh ‘Zofate Pathian Biak Inpui’ tih a nih thu an sawi a. “He Biak Inpui hi Kohhran pawl Biak In anga a hran inkhawmna tur a ni lova, khualzin hiptu, khawvela Biak In lian ber tur a nih avangin heng khualzin (Tourist) lo kalte hnenah Zofaten chanchintha kan lo hrilna hmunpui tur a ni,” tiin ‘Mission Centre’ ang te pawha sawi theih tur a nih thu an sawi a. “Main Auditorium hi mi 30,000 leng tura ruahman a ni. Tin, pindan tin ah Bible thawnthu khualzin te kan hrilh tur lemziakin a awm bawk dawn a ni. He Biak Inpui hi Zofa Kristian pawl (denomination) a in thendarhte kan luankhawmna hmun tur, Kohhran pawl zawng zawngte inzawm-khawma rorelna hmunpui tur leh Inkhawmpui nan te pawha kan hman theih tur a ni,” an ti.

Zoram Thar Zofate Lairelna Inpui chuan January 2024 khan Official Letter nen Zoram Thar puipate chu Synod Office-ah te, Salvation Army, Seventh-Day Adventist, Catholic, IKK, UPC leh Kohhran dang te Office Headquarters-ah lengin, he Biak Inpui chungchang hriattirna te an lo neih tawh thu leh BCM Hqrs. ah pawh lehkha an thehluh thu an sawi a. “Kohhran hruaitute nen inkawmna hun tha tak kan nei a, engmah harsatna a awm thu kan hriat loh avangin a kum leh 2025 April thla atangin Press Club-ah pawh tlangzarh a ni leh hnuin, Zofate Pathian Biak Inpui sak hnatlang hi bultan a ni ta,” an ti.

Tunhnaia Synod thuchhuak lo awm leh Presbyterian Biak In-a Biak Inpui thawhlawm thawh lo tura ngenna puan a nih chungchang pawh sawiin, “Kohhran mala hnatlang thawhlawm thawh tura sawmna hi mipui in hawn em avangin Thenzawl leh Tlangnuam-ah chauh thehluh a ni a, hetiang thuchhuah a awm takah chuan Kohhran mal sawmna erawh chhunzawm a ni tawh lo ang,” an ti a. Zofate Pathian Biak Inpui hi khawvel puma Zo hnahthlak Zofate a neitu an nihna angin hnam hnatlâng thawhlawm thawh vek turin an sâwm nawn leh a. “Mipui zingah thawh duh in thahnem hle tih kan hria a, min ngenna angin hnatlang thawhlawm Zofaten kan thawh zel theih nan hma lak chhunzawm zel a ni dawn a ni,” tiin tlem lua leh tam lua awm lova thawh turin an ngen nawn leh bawk a ni.