UAE-a Zofate bepawp reng

Mizo Diaspora Cell chuan UAE-a Zofate dinhmun ngaichang in an bepawp reng tih an sawi.

Nimin khan Mizo Diaspora Cell (MDC) Chairman Vanlaldina Fanai chuan thuchhuah siamin Middle East ram lama Mizo tangkhang emaw, tanpui ngaite emaw tana Indian Embassy/Consulate emaw, Mizo Diaspora Cell-te emaw biakpawh theih reng an nih thu a tarlang a, buaina huamchina awmte chuan passport leh visa copy, document pawimawh te photocopy/ soft copy neih that a, original a bo palh pawh a backup copy kawlthatte, Phone number pawimawh bik mahni Emergency Contact-te chhinchhiah turin a ngen bawk. 

MDC Chairman chuan Middle East a awm mek Zohnahthlak mipuite chi ai mai lova sawrkar thu ngaichang tur leh zawm tura ngenin, an awmna rama Indian Embassy/Consulate-te thuchhuah ngaichang tur leh awlsam zawka Mizo-ram sawrkar nen chanchin inhriat pawh theihna turin Mizo DiasporaHub-a in register theuh turin a hriattir bawk. Vanlaldina chuan Chief Minister enpuina hnuaiah, Mizo Diaspora Cell chuan Middle East rama awm mek Mizo mipuite dinhmun a ngaihven reng tih a sawi a ni.

Hetihlai hian Iran-a buaina kal zelah hian Zofa Society of Emirates President Mesak Lalram-pana chuan Middle East Region-a Zohnahthlak awm ten harsatna an tawk rih lo tih a sawi a, tun dinhmunah Middle East Region-a Zohnahthlak mi 100-150 vel an awm mêk tih sawiin, Iran a buaina thleng avangin Inrinni leh Pathianni khan Middle East lam atang pawhin missile thlawk leh puak hmuh tur a awm zeuh zeuh thu a sawi. Mesak-a hian Middle East lamah Nilaini thlengin School an khar thu leh Office pawh a thei thei chu in lam atanga thawk tura  sawrkar chuan thu a chhuah tih a sawi a, Zofate zingah harsatna tawk an awm rih lo ni a an hriat thu leh a theih chen chenah mahni ina awm tura an in chah thu a sawi bawk.