District tin-a District Plan a taka kalpuina turin District Catalytic Intervention Plan Fund pek an ni

Nimin khan Chief Minister Lalduhoma hovin District Catalytic Intervention Plan Fund sem niin Mizoram-a District tinte chu an District Plan a taka an kalpuina tur cheng vaibelchhe khat theuh pek an ni.

District Catalytic Intervention Plan Fund semna hun hi Planning & Programme Implementation Committee Room-ah neih niin Chief Minister Lalduhoma chuan tun hmain District Planning Committee hi din a lo nih tawh thu leh thutkhawm te pawh an neih ve thin thu sawiin, “Nimahsela, an District Plan te a taka an kalpuina tur Fund pek an ni ngai lova. An ruahmannate a takin an kalpui thei thin lo. Kan sawrkar hian District-ten hma an sawnna tura anmahni ngeiin Plan an neih leh chumi ti hlawhtling tura sum leh pai pek ngei theih hi kan duh a. Vawiin ah a bul kan tan ta a. Kan flagship Scheme Bana Kaih tihhlawhtlinna pakhat a ni,” a ti. Chief Minister chuan he an hmalakna enzuina kawngah hian District Bawrhsap te chu thuneihna sang tak pek an ni tih sawiin, “Project Proposal pawh DC te bultuma siam a ni bawk a. He Fund a hlawhtlin theih nan hian kan DC ten mawhphruhna pawimawh tak an chelh a ni. A bul kan han tan ang a, kan hman that viau chuan a dang pawh la pekchhuah zel theih tura duan a ni a. Hna kha a chhe tur a ni lo,” tiin Bank Cheque-in sum te hi a hlan a ni.

He hun hi Planning Secretary Lalmalsawma chuan kaihruaiin Catalytic Plan kalpui dan tur tlangpui a tarlang a, Planning Department Commissioner Vanlaldina Fanai chuan hetianga DC ten an District hmasawnna tura an hmalakna atana pawisa a pek tum khatna a nih thu sawiin, a lawmawmin hmasawnna chhinchhiahtlak tak a nih thu a sawi bawk.

He Fund hi Handholding Scheme Component 5 na, Decentralised Plan hnuaia pek niin an pawisa dawn zaa sawm hi Admin Fund atana hman theih a ni anga, an thawh that dan a zir zela la pek belh zel tur a ni. Nimin-a Fund pekchhuahna hunah hian Deputy Commissioners te aiawhin Aizawl Bawrhsap Er. Lalhriatpuia chuan thu sawiin, District ten project an neihte hi Mizoram District Transformation Programme zulzuia an kalpui vek a nih thu a sawi a. Scheme dang nena kaikawp (convergence) zawnga kal awm bawkin, Sawrkarin hetianga hmalakna tur Fund a pe chu an lawmin an phur hle tih a sawi bawk.

Mizoram District Transformation Programme hnuaiah Department hrang hrangin District Baseline Profile, District Transformation Vision leh District Catalytic Intervention Plan te siamin heng te hi DC Office-ah thehlutin, DPC thukhawm chuan an ngaihtuah leh a. DPC-in a pawmpuite chu State Level-ah thehluh leh niin Ministry Level-ah hmalakna kalpui leh turin ruahmanna siam a ni.