MNF in Mizoram Independence Puan kum 60-na lawmna hun Aizawl-ah an hmang

MNF chuan Mizoram Independence Puan kum 60-na, Diamond Jubilee lawmna hun chu nimin khan Aizawl Vanapa Hall-ah an hmang a, MNF President Zoramthanga chuan Mizo Hnam Run-ah ‘Diamond Jubilee lungphun’ a hawng a ni.

MNF in Mizoram Independence Puan Diamond Jubilee an lawmna hunah hian MNF President Zoramthanga chuan MNF chu kum 1961-a din niin tunah kum 65 hmel a hmuh tawh thu sawiin, Mizoram Independence puan kum 60-na tling thei tura MNF nunna zuah zel a la ni leh MNF Founder President, Laldenga nupui,Biakdiki pawh thu sawi theia a la awm chu Pathian hnenah lawmthu a sawi a. India Independence lai khan E.Pakistan-a a awm te, Burma rama awm duh te, India-ah emaw British hnuaia la awm zui duhte leh Independence duhte an awm thu sawiin, “Agreement sign leh ban phartirna pawh awm lovin India-ah khan kan awm ta ringawt a ni. Hei tak hi Pu Denga te khan India Prime Minister hnenah ‘India chu Republic a nih a, Constitution an siam lai khan India siamnaah kan tel ve lo a, barhluih kan ni an ti a. India ramah kan tel ve dawn anih pawhin Mizoram tana tha leh him tur kan duhzawng kan sawi ve ang chu, chuti ni lova Constitution in barhluih ringawt chu thil fello tak a ni’ an tih chu khatih laia Prime Minister Lal Bahadur Shastri pawh khan hnial ngaihna a hre lo, 'mithiamte ka lo rawn phawt ang e' a lo ti,” a ti.

MN President chuan, “Hun a kal zel a, kum 1966 February ni 11-ah Assam Chief Minister Chaliha chu Pu Denga'n biain, 'Sipai kan tir lo ang in ti si a, enga ti nge in rawn tirh leh si?' tia a zawh chuan 'ka rawntir lut lo thei lo' tiin a lo chhang a. Pu Denga'n buai ai chuan Chaliha chu biak a tum leh a, Chaliha chuan a lo be duh ta lo a. Keini pawhin kan tih tur ngaihtuahin March ni 1, 1966 khan Mizoram Independence kan puang ta a, kan inkap tan ta a ni,” a ti a. “Kum 20 chhung kan inkah hnuin Kohhran, NGO leh pawl hrang hrang ngenna angin inremna entawntlak ber kan nei ta a. Electoral Roll-a la awm lo thlantlin hlim Chief Minister nihna Pu Denga'n a lan theite kha a inremna ropuizia tilangtu a ni. Kha inremna kha thenkhatin sawi bawrhban tum thin mah se, a hlutzia kan hre zel a ni,” a ti bawk.

MNF in Mizoram Independence Puan kum 60-na an lawmna hun hi MNF Sr. Vice President Dr. R. Lalthangliana chuan kaihruaiin MNF Founder Laldenga nupui Lalbiakdiki leh Ex-MNA Association President Rochungnunga te pawhin thu an sawi bawk a ni.