Supreme Court in Mizo Chief Council-te Zangnadawmna phutna a hnawl sak

Supreme Court chuan Mizo Chiefs Council ten ‘Assam Lushai Hills District (Acquisition of Chief’s Rights) Act, 1954 hnuaiah Lushai Hills (Mizoram) Mizo lalte ram chu zangnadawmna mumal pe lova laksak an ni’ tia Writ Petition thehluta an ram chhuhsak an nih man zangnadawmna an dil chu a hnawlsak.

India rama Court sang bera Justice JB. Pardiwala leh Justice R Mahadevan thutna Bench chuan hemi chungchangah hian kar kalta Nilaini khan thutlukna a siam a. Mizo Chiefs Council-in an President L. Chinzah kaltlanga Petition an thehluh ah India sawrkarin khatih lai Lushai Hills-a Mizo lalte ram chu India sawrkarin zangnadawmna pe lova a chhuhsak ti a sawrkar an khinna chu a hnawl a. Mizo lal lo ni tawh leh an thlahte aiawha din Mizo Chiefs Council chuan India sawrkar chu Mizo lalte chanvo, a bikin 'right to property' chhuhsak ah an puh a. Hemi chungchangah hian Court chuan India Constitution Article 19(1)(f) leh Article 31-na chuan mihring chanvo, a bikin right to property chungchang hi a ziak ngei a. Chuti chung chuan Mizo lalte hian an chanvo palzuta rahbeh a ni tih hi Court-ah an finfiah thei lo a ni, a ti a ni.

The Mizo Chiefs Council-te chuan Supreme Court-ah hian sawrkar laipui hi kum 2014 khan a khing a. He thubuaiah hian Mizo Lalte chuan an chanvo neih thin pek let emaw, zangnadawmna pek an dil a. Lal 309 awmna The Mizo Chiefs Council te chuan Assam Legislative Assembly-a The Assam Lushai Hills District (Acquisition of Chief’s Rights)Act, 1954 siam anih hnua an chanvo leh dinhmun tha an hloh tak avangin Court-ah hian zualko in an thuneihna leh an ramte chu laksak an nih avangin Mizo Lalte hi ram nei mumal lo in an awm a. Mizo Lalte hian tun hmaa an dinhmun pek let an nih dawn loh chuan zangnadawmna cheng vbc. 500 pe turin Court-ah hian an dil a ni. Mizoram sawrkar chuan Mizo Chiefs (Lal) te thilphut chu tawmpuiin Supreme Court-ah Affidavit an thehluhsak a; amaherawhchu, zangnadawmna pe tura an phut hi ‘sawrkar laipui (central government) pek tur zawk a ni’ tiin Supreme Court-ah hian an thlen nia thudawn a ni.

He thubuai-a hearing hnuhnung ber chu August 31, 2025 khan neih niin Supreme Court chuan Ukil te chu Written submissions (thubuai neihte, dan leh hrai inghahnate leh finfiahna etc. inziahna) karhnih chhunga pe turin a tih hnuah tunhnai khan thutlukna hi siamin, Mizo Chief Council te ngenna hi a hnawlsak a. Mizo lalte hian British hunlai a India rama lalram (princely state) te nen khan inang khat an nih thu an sawi na a, Court chuan India rama lal dangte kha chu Constitution duan hma a inremna siam anga zangnadawmna pek an ni a, chutiang chu Mizo lalte dinhmun a ni ve lo, a ti a. Court chuan lalte thuneihna tih bo a nih atanga kum sawmruk deuhthaw hnuah petition thehluh a ni chu pawm theih a ni em tih ngaihtuah bawkin, Court chuan High Court-ah te kalin sawrkar lam te hian beiseina an pek thin avangin ngaihhnathiamna pein he thubuai hi ngaihtuah phal mah se, a tawpah chuan lalte hian ram chu dan ang taka an ta (legal ownership) a ni tih an finfiah zawh loh thu a sawi bawk a ni.