Khawl leh mihring chhawr belh turin Court in hriattir

Gauhati High Court-a Judge pahnih thutna Bench chuan Aizawl leh Vairengte inkara kawng siamtu Contractor pakhat chu khawl leh mihring chhawr belh turin a hriattir nawn.

Gauhati High Court Bench-in khawl leh mihring chawr belh tura a hriattir nawn J. Infratech Limited hian Sairang Zero Point leh Buichali lei inkar, New Khamrang leh Kawnpui inkar leh Kolasib leh Bilkhawthlir inkar kawngpui siam hna NHIDCL hnuaiah a thawk a. Kar kalta Nilaini khan Justice Budi Habung leh Justice Kaushik Goswami te thutna Bench chuan, “February ni 4-a he Court thupek angin thupek an zawm thu hi J. Infratech Limited hian affidavit an rawn thehluh belh a. Hna an thawh belh leh an hmasawn dan bakah report hmasa zawk an thehluh hnu thla 2 dawn chhunga an hnathawh za zela a pun chhoh dan an tarlang bawk a ni,” a ti a, a khingtu Mizoram Truck Drivers Association (MTDA) aiawha ding Emily L. Chhangte erawh chuan a hmun ngei a tlawhin kawngpui dinhmun la chhiatzia thu a sawi a. Hetiang renga an hna hi an kalpui chuan fur a lo thlen meuh chuan kawng hi nasa takin a chhe leh dawn tih sawiin, a dinhmun dik tak hi report a pek theih na'n chawlhkar khat hun pe turin Court hi a ngen a ni.

Judge pahnihte chuan J. Infratech Limited chu April thla chhung ngei a kawngpui siamthat hna thawk zo hman tura thupek an nih tawh thu an tarlan nawn leh rualin Fur lo thleng hnai tawh nen he Company hna thawh danah hian Court a lungawi lo hle tih an sawi a. Hnathawh theih hun lai a hna thawhna atana hman khawlte leh mihring an chhawr belh loh chuan Fur ruahtui a tlak chuan kawngpui hi a chhe leh zual dawn a ni, an ti a. Khawl leh mihring chhawr belh nghal turin contractor hi a hriattir a, hma an la ngei a ni tih finfiahna affidavit March ni 24-a thehlut tura hriattirin an ti lo a nih chuan a mawhphurtu Officer chu Court-a inlan ngei tura koh luih a nih tur thu an tarlang bawk.