Serchhip-ah Hmeichhia hleilenna tuartute tan Free Public Hearing - Mahila Jan Sunwai neih a ni

Hmeichhia hleilenna tuartute tan Free Public Hearing - Mahila Jan Sunwai chu nimin khan Serchhip Kawnpui VC Hall-ah neih niin he hunah hian hleilenna tuar hmeichhia ten harsatna an thlen chu ngaihtuah sak an ni.
National Commission for Women, New Delhi leh Mizoram State Commission for Women ten International Women's Day puala hmeichhia hleilenna tuartute tana Free Public Hearing - Mahila Jan Sunwai an buatsaih hi Serchhip Bawrhsap Paul L. Khuma chuan hmanpuiin, “Sawrkar hnathawk kan ni a, mipui rawngbawlsaktu kan nih angin Vawiin-a kan thil tih hi mipui rawngbawlsakna ‘government service’ a ni,” tiin Aizawl pan kher ngai lova a thawktu te Serchhip-ah kala an harsatna te chinfel sak an ni chu lawmawm a tih thu a sawi a. Inchhung khur-a nupuite kutthlak (domestic violence) ching an la awm chu pawi a tih thu sawiin, “Nu leh pa ten kan fate entawntlaka kan awm a tulzia i hre thar leh ang u,” a ti a. Kan nu te emaw, kan farnute emaw hleilenna tuar kan awm chuan a thlenna tur dik takah kan thlen a, Dan-in dikna chanvo min pekte hi a taka kan chan theih a tul thu sawiin Mahila Jan Sunwai chu tangkai taka hmang turin duhsakna a hlan a ni.

He hunah hian Mizoram State Women Commission Chairperson C. Zodinpuii pawhin thu sawiin hmeichhia hleilenna tuar ten Aizawl an pan kher ngai lovin District tinah Deputy Commissioner kaihhruaina hnuaiah Commission Member te, Legal Services Authority, CDPO, DPO, DCPO, Police Department te nen tangho in International Women’s Day 2026 denchhenin March 9 atanga ni 13 chhung hian Mahila Jan Sunwai an neih thu a sawi a. Serchhip District-ah chuan nimin, March ni 10, 2026 khan nilengin hun an hman dawn thu leh an harsatna chinfel nghal theih chi chu chinfel nghal a nih tur thu a sawi a. “Case lut a tam lo a nih pawhin mi tlemte tal pawhin hlawkna an chan theih hi kan duh a ni,” a ti bawk.

Nimin khan nileng-in Free Public Hearing - Mahila Jan Sunwai hi hman a ni a, he huna ngaihtuah tur hian Hmeichhe pangate hnen atangin complaint dawn a ni a, an thubuai hi hmun leh hmunah chinfel nghal theih a nih loh avangin Police, District Legal Services Authority (DLSA) leh One Stop Centre (OSC) lamah refer an ni. Complaint tam zawk te hi hmeichhiate dikna chanvo rahbeh sakna te, chhawmdawlna dawn tur ang dawng lo te, rokhawm chungchanga buaina te leh Child Custody chungchang te an ni.