Serchhip-ah District Bawrhsap hovin World Consumer Rights Day 2026 hman a ni
Serchhip DC Pisapui Hall-a World Consumer Rights Day 2026 hman ah hian Bawrhsap chuan mi tinte hi Consumer kan ni vek tih sawiin, Consumer ten kan dikna chanvo kan hriat a pawimawh thu a sawi a. “Thil zuartu in a duh duhin thilman a tisang thiang lo a, thil kan leiin MRP kan en thin tur a ni,” tiin, MRP aia sanga hralh an awm chuan Consumer Court-ah thlen nachang hriat a tul thu leh thil diklo ti an hmuh chuan thuneitute hnena thlen chu mipuite mawhphurhna a nih thu a sawi a. Sawrkar kut ringawtah innghat lovin, Vantlang Viltu kaltlang pawha thlen theih a nih thu leh hmang tangkai se a duh thu a sawi a. “Mi tinin dikna chanvo kan nei a, kan dikna chanvo humhalh turin Dan hnuaiah thuneitute nen i tang tlang ang u,” a ti bawk.
Serchhip-a World Consumer Rights Day puala hun hman hi District Civil Supplies Officer (DCSO) leh District Consumer Protection Council Member Secretary R. Zirliana chuan kaihruaiin Serchhip-a Legal Metrology Inspector Johny Zonunmawia chu Resource Person niin he ni thupui hmang hian thu a sawi bakah Chhiahtlang Consumer Union President R. Chhuanthanga pawhin thu a sawi a. Serchhip District Consumer Association Secretary Dr. Laldinpuia’n report pein SDCA President RL. Chhuanawma’n lawmthu sawiin hun a khar a ni.
Serchhip District Consumer Association hi Mizoram-a Consumers Association zinga hma la tha ber te zinga mi niin kum 2021-ah ‘Minister Award’ an lo dawng tawh a. Eirawngbawlna Gas-ah Serchhip hi a khaw pum huapa Home Delivery tihlawhtling thei hmasa ber niin Mipui (consumer) ten harsatna an tawh te leh Complaint an thehluh te rang taka bawhzui nghal zel a ni a. Kum 2025 chhungin District Commission (District Court)-a thubuai lut 12 zingah 11 chu chinfel a ni a, case pakhat erawh a puluttu a inhnukdawk leh a ni. Serchhip District huamchhunga Consumer Branch 3 hnenah Digital Weight Scale pek an ni a. Aadhaar Card chhuak theilo te hmalak sak an ni bakah kawng hrang hrangin hmalakna an kalpui bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!