School thenkhat dinhmun tha zawka hlankai te Academic Session thar ah kalpui tum a ni

School Education changtu Minister Dr. Vanlalthlana chuan School thenkhat dinhmun tha zawka hlankai chu Academic Session tharah dan anga kalpui theih tura buaipui mek a ni tih Assembly House hrilhin, School 100 chu dinhmun sang ah dah an nih tawh thu a sawi bawk.

Mizoram Legislative Assembly thutkhawm nimin-a chhunzawm ah BJP Member K. Hramo zawhna chhangin School Education Minister Dr. Vanlalthlana chuan Ministry hmasa in dinhmun tha zawka a hlankai School 52 zinga dan anga tlingte chu Academic Session 2026-2027 ah hian dan anga kalpui theih tura buaipui mek a ni tih sawiin, School Upgradation Notification chu tihchhuah tura buaipui mek a nih thu a sawi a, Lumpsum GIA-a upgrade-na notification chu kumin February ni 6 khan tihchhuah a nih thu leh Budget Session lo awm turah hian School upgradation-te tan Financial Yeay 2026-2027 Budget-ah pawisa dah a ni lo tih a sawi bawk. MNF Member Lalrinsanga Ralte zawhna pawh chhangin Education Minister chuan, “Sawrkar hmasain School hrang hrang upgrade tura a lo tih tawhte zingah upgrade tawh zat chu Lumpsum GIA-ah Higher Secondary School 22, High School 44 leh Elementary 34 an ni,” a ti bawk a. “Lumpsum GIA rate tih pun tawh a ni a. Hei bakah hian Aided School dangte pawh an dinhmun that theih zawkna turin Study Team din a ni a, chumi Study Team recommendation ang chuan dan siam a ni a. Notify tura hma lak mek a ni,” a ti.

Zawhbelhna chhangin School Education Minister Minister Dr. Vanlalthlana chuan School 52 tih thin chu khawi School bik tak nge an nih hriatthiam a harsat thu sawiin, sawrkar hmasain dinhmun tha zawka hlan kai tura a tih hrim hrim chu School 180 zawk a nih thu a sawi a; PM Shri School 35 a awm thu a sawi bawk a. “Lumpsum Pro adhoc bik atan tun Session-ah Rules pharh hman tum a ni. Provincialised-ah file tang deuh a awm a, kan nawr mek,” a ti a, School te chu kum 2023 criteria hmanga teh an nih thu a sawi bawk a ni.

Private School te Provisional Adhoc Grant-in-Aid a dah tumna chungchanga BJP Member Dr. K. Beichhua zawhna pawh chhangin Education Minister chuan Pro-Adhoc GIA a dah tum leh tum loh chungchangah thutawp siam ala nih loh thu leh Pro-Adhoc GIA a School dah tur list chu tihfel ala nih loh thu a sawi a. “School upgrade dawn hrim hrim hian dan ang thlap a upgrade tur an ni a, Eligibility Criteria hrang hrangte hi enfel uluk a ngai thei hle bawk a, heng thil hrang hrang avangte hian School upgrade chungchang hi chinfel a la ni lo a ni,” a ti bawk.