SCC 10-ah Sawhthing quintal 5,887 hralh tawh

Mizoram sawrkarin Sawhthing hralh hun a kalpui mekah Secondary Collection Centre (SCC) 10 atangin Sawhthing quintal 5,887 hralh a ni tawh.

    Thla hlui February ni 2 atanga Support Price awma kut hnathawktuten Sawhthing an hralh theih hun chhung tura a ruahman kal mekah tun thla, March ni 3 thleng khan Mizoram-a SCC 10 atangin Sawhthing cheng nuai 187.49 man hralh ni tawhin sawrkarin Support Price a pek tur nen chuan a vaiin cheng nuai 294.35 man a ni a. Mizoram Agriculture Marketing Board (MAMB) hotute sawi danin, Sawhthing hralhna hmun tur bika ruahman SCC 64 zinga SCC 10-ah sumdawng ten kut hnathawktute Sawhthing an lei tawh a, heng SCC 64-a Sawhthing awm zat tura tarlan chu quintal 3,46,470 niin tuna sumdawngten an lei tawh zat hi a vaiin quintal 5,887 a ni. Sawhthing hi sawrkarin ba awm lova lei tura sumdawngte a tih angin sumdawngte hian an Sawhthing leina man hi kut hnathawktute hnenah an pe vek tawh nia thudawn a ni bawk.