ATL Road siam nan State sum leh SASCI hmang

PWD Minister Vanlalhlana chuan Aizawl - Thenzawl - Lunglei (ATL) kawng siam hna chu hmun pali-ah then a nih thu leh kawng siam nan State sum leh SASCI atangin cheng nuai 7,157.47 ruahman a nih thu a tarlang.

Nimin-a Assembly thutkhawm chhunzawm-ah Hachhek Bialtu MLA Robert Romawia Royte zawhna chhangin PWD Minister Vanlalhlana chuan, “ATL kawng hi hmun pali-ah then niin, hmun khatna hi Kulikawn atanga Silaimual thlang thleng a ni a, hemi atan hian Technical Sanction leh Tender buaipui mek a ni. Administrative approval leh Expenditure Sanction hmuh tawh a ni a, Technical Sanction leh Tender tur buaipui mek a ni,” a ti. ATL kawng siam tur hlawm hnihna chu Mualthuam atanga Mausen inkar a nih thu sawiin, “Expenditure sanction awm tawhin, April 24, 2026 khian zawh hman tura ruahman a ni,” a ti a. Hmun thumna chu Mausen khua thlen hma atanga Pukpui inkar a nih thu leh hlawm lina chu Pukpui dai atanga Lunglawn-a Petrol Pump thleng a nih thu a sawi a, “Hmun 3-na leh hmun 4-na hi chu tunah hian a siamna turin sum kan dah (allocate) fel chiah a. Chak taka hmalak tum a ni e,” a ti bawk.

Hei bakah hian PWD Minister Vanlalhlana chuan MNF Member Lalrinsanga Ralte leh K. Laldawngliana te zawhna intawm chhangin National Highway 306 Sairang to Kawnpui via Khamrang kawng chhia repair nan kum 2025-2026 chhungin Public Works Department kaltlangin Rs. 7,73,34,994.14 senral a nih thu a sawi a. National Highway - 306 Sairang to Thingdawl inkar kawng chu National Highways and Infrastructure Development Corporation Limited (NHIDCL) ten an siamthat mek thu leh heng hna te hi kumin June-a zo turin an inruahman thu a sawi bawk a ni.