Chief Minister chungchang sawina nawhreh a ni

Nimin-a Mizoram Legislative Assembly Session-ah Speaker Lalbiakzama chuan MNF Member Robert Romawia Royte-in Chief Minister Lalduhoma chungchang a sawina chu amah pawhin rem a tih angin House Record atangin nawhreh a nih dawn thu a sawi. Nimin-a Assembly thutkhawm tan a ni veleh hemi chungchang hi Speaker chuan sawiin, Robert Romawia thusawi chunchang hi Chief Minister chuan a sawifiah bawk a, “Gangtok kan kal kha kum 2006 a ni a, ni khat kan châm. PAC Chairman ka nih lai niin a kalte chu Pu R Lalzirliana, Pu Lalrinliana Sailo, Pu Thaliana leh Pu D. Thanglian te an ni,” a ti a. Hlim takin an kal thu leh hlim taka an haw leh thu sawiin, “Kan thlen hun chiah ka hre ta lo a, dar 1:45 vel niin ka hria. Khatiang thil kha thleng tak tak ni se khatih hunah khan a ri hluai ang,” tiin kum 20 hnua phuahchawp thil tih a ni chu pawi a tih thu a sawi bawk.