Rilru leh pianphunga harsatna nei fa te enkawl dan tur sawihona leh zirhona neih a ni

Social Welfare Department leh Spastic Society of Mizoram (SSM) tangkawp buatsaihin nimin khan fate zinga rilru leh pianphunga harsatna nei nu leh pate tana inzirtirna hun ‘Sensitization Workshop for Parents of Children with Special Needs’ chu Dawrpui Multipurpose Centre-ah neih a ni.

Nimin-a he hun hman hi Social Welfare Women & Child Development Department Commissioner & Secretary Lalzarmawii chuan khuallian nia hmanpuiin Fate zinga rilru leh pianphunga harsatna nei nu leh pate dinhmun chu engemaw chang chuan harsa tak a nih tur thu sawiin, beidawng mai lo leh kawng awm ang angte dap zel thei tura inhrilhhriatna neih chu tihmakmawh a nih thu a tarlang a. Nu leh pate chu an rawngbawlna an ko a tla hlen kawngah theihtawp chhuah zel tura fuihin, fanau rochan malsawmna an dawnte chhiar thiam a, an fate enkawldan tur inzirtirna hun chu hlawkpui ngei tum tlat turin duhsakna a hlan nghal bawk a ni.

Sensitization Workshop-ah hian Mizoram-a Special School leh Centre hrang hrang atangin Rualbanlo fa nei nu leh pa kalkhawm ten nitin khawsakna kawnga buaina leh harsatna hrang hrang an hmachhawn thinte, an fate harsatna avanga zirna in leh khawtlang nun bakah chhungkua leh Kohhran-a harsatna an tawh thinte sawiho in, mithiamte nen hmalakho dan tur leh an fate enkawl zeldan tur an zirho a. He hun hi Spastic Society of Mizoram Chairperson Chhingpuii chuan kaihruaiin Neihtluangi, Vice Chairperson Spastic Society of Mizoram chuan Sensitization Workshop an buatsaih dan leh a pawimawhna te a sawizau bawk a ni.