AMC inthlan tur tan Political party te inbuatsaih

Aizawl Municipal Corporation (AMC) inthlan neih tur atan Political Party ten theihtawp an chhuah chhunzawm zel a, ZPM, MNF leh Congress Party te chuan Seat awm zawng zawng chuh an tum thu an sawi a, BJP erawh chuan Seat an chuh zat tur hi an la sawi chiang thei lo thung.

Nimin khan thuthar thehdarhtu thenkhat ten Aizawl-a Political party hrang hrangte Pisa tlawhin ZPM General Secretary-a GAD changtu Eddie Zosangliana Colney chuan Aizawl Municipal Corporation-a ZPM ticket a ding turte chu karleh Thawhtanni, March ni 23-ah puanzar a ni dawn tih a sawi a, AMC inthlanna neih turah an inbuatsaih that bakah an Party Ticket-a ding turte pawh veng tin a uluk taka an thlanchhuah an nih thu a sawi a, ZPM sawrkar chu tun dinhmuna an chet that avangin AMC inthlanah pawh an chet that a rin thu leh inthlan hun puan a nih hnu phei chuan ngawrh lehzual a tan lak an tum thu a sawi bawk. Eddie Zosangliana chuan ZPM-in AMC inthlan-a sawrkarna an siam thei a nih chuan Aizawl khawpui chu Aizawl thar “New Aizawl” ni thei tur khawp a siam an tum thu a sawi bawk.

Mizo National Front (MNF) Sr. Vice President leh Dampa Bialtu MLA ni bawk Dr. R. Lalthangliana chuan AMC inthlan lo awm tur atan an party Candidate tam zawk te chuan nikum lam atanga ngawrh taka hma an lo lak tawh thu leh sawrkarna siam leh ngei tura beiseina lian tak an neih thu te a sawi a, General Headquarters bakah Block leh Unit-ah te AMC dintu an nih anga AMC thil tum dik tak, a dinchhan ti hlawhtling tura Aizawl mipuiten a beisei anga sawrkarna siam leh ngei tura theihtawp an chhuah tur thu a sawi a ni.

Mizoram Pradesh Congress Committee (MPCC) Vice President RL. Vala chuan AMC-a Congress Candidate-te chu khawtlang leh Kohhran a mi tangkai tak an nih thu leh Bial tin chuh kim vek a sawrkarna siam thei tura tan an lak tur thu a sawi a, Aizawl Municipal Corporation chu mipuite banphak ni tura hmel thar put tir an tum thu leh sawrkarna siam thei tur khawp a theihtawp an chhuah tur thu a sawi a ni.

BJP Mizoram State General Secretary leh MADC-a MDC ni bawk Delson Notlia chuan AMC inthlan lo awm tur atan Manifesto Committee bakah Search Committee-an din thu leh tum sarih lai Search Committee-te hi an thutkhawm bakah Candidate hming thenkhat phei chu National Party an nih angin Central lam pawmpui tura Delhi lamah an thawn thlak thu a sawi a, AMC inthlan lo awm turah BJP Candidate-te thlantlin an nih phei chuan sawrkar laipui a a fawng chelh lai an nih angin sorkar laipui chuan Aizawl khawpui tihhmasawnna atan leh Aizawl khawpui harsatna sutkian nan hma an lak tur thu a sawi bawk.