Retailer ten an term hmang zo vek se duh; Retailer te tan hmun nghet siam a ni dawn

Food, Civil Supplies & Consumer Affairs Minister B. Lalchhanzova chuan ‘Mizoram-a Retailer zawng zawngten an term an hmang zo vek tur a ni’ tih chu an dinna a nih thu a sawi.

Assembly Session nimin-a neih ah Member zawhna chhangin Supply Minister B. Lalchhanzova chuan, ZPM sawrkar a lo pian tirh khan Retailer tumah an thlak lo a, ‘An term an hmang zo vek tur a ni’ tih chu tuna an dinna a la nih reng thu a sawi a, Party hrang hrang atanga Retailer awm zat chu sawrkarin a hriat loh thu leh an Term an hmang zo a nih chuan Advertisement  hmang te in Retailer thar an la zel tih a sawi bawk. Supply Minister chuan, ZPM sawrkar hnuah party inthliarna anga buhfai dawn theih dan Categorization a awm thar thut a hriat loh thu a sawi a, Ration dawn chu mitin chanvo a nih angin kalpui a nih thu leh Ration Card dil lo pawh khua leh tui an nih chuan automatic-in Ration Card an nei a, ration mamawh ve lo te tih loh chuan automatic-in Fair Price Shop atangin buhfai an lak mai zel tih a sawi bawk.

Food, Civil Supplies & Consumer Affairs Minister B. Lalchhanzova chuan Mizoram-ah Furpui leh engemaw chhiatrupna a thlen palh pawha Buhfai dahkhawlnaa harsatna a awm loh nan Retailer ten hmun nghet neia buhfai an sem theihna tur hmun leh Kudam ni pahfawm tur Permanent Fair Price Shop a tam thei ang ber siam an tum thu zawhna chhangin a sawi bawk a. Mizoram-ah buhfai dahna Kudam 112 a awm mek thu sawiin, NABARD atangin Permanent Fair Price Shop sakna tur loan cheng vbc. 5 an hmu a, tunah hian a bultan nan hmun 20-ah an sa dawn a, chutah chuan a hmun a zirin quintal 100 te, quintal 80 te, quintal 150-te a leng dawn a, heta tang hian retailer-ten buhfai an sem thin dawn tih a sawi a. Permanent Fair Price Shop hi a tam thei ang ber sak an duh thu leh buhfai dahthat theih zat a pun dawn thu a sawi a, “Vawiin ah hian Mizoram pumah buhfai han stock viau pawhin in ngai thin mah ila quintal 180,000 te kan dah hi chuan dahna tur kan nei lo der a ni,” tiin chhiatna nasa tak thleng ah harsatna a thlen theih thu a sawi bawk.

Supply Minister chuan FCI atanga buhfai lei zat zawhna pawh chhangin NSFA hnuaiah Card Pawl leh Card Eng te tan FCI atangin thla tin quintal 41,000 vel a thlawna dawn thin a nih thu leh Tied Over an tih hmangin quintal-ah Rs. 840 in thla tin quintal 13,000 vel lei a nih thu a sawi a. A bak kan mamawh belh, thlatin quintal 37,000 vel chu Rs. 3590 in SPU 4- MAMCO, MIZOFED, ZIDCO leh MIFCO ten SPAB kaltlangin an supply mek thu leh mimal supply tir an awm loh thu a sawi bawk. Hei bakah hian Supply an pek dan pawh Minister chuan sawiin, “Thla tin lei belh ngai kan chhutchhuak a, chu chu heng PSU-ah hian kan pe thin a ni,” a ti bawk.