MNF Thalai ten Minister atanga bang turin an phut; ZPM in dan bawhchhiatna a neih loh thu an sawi thung

Nimin khan Aizawl Vanapa Hall kawt-ah MNF Thalaite pungkhawmin Education Minister Dr. Vanlalthlana chu a Department chan te hneh lo leh thil diklo ti a puhin bang tura an phut thu an sawi a. Hetihlai hian ZPM chuan Dr. Vanlalthlana chuan Dan bawhchhiatna pakhatmah a nei lo niin an sawi thung.

Nimin-a pungkhawm MNF Thalaite chuan Education Minister Dr. Vanlalthlana chu bang tura an phut thu sawiin, “A awmna party ZPM MLA Chairman-na hnuaia Assembly Petitions Commitee-in Minister Dr. Vanlalthlana’n Restricted Tender hmanga contractor a thlan dan chu eirukna/corruption lian tak leh dik lo tak a ni tih a finfiah a, Cancel an phut angin sawrkarin an cancel sak,” tih sawiin, “Ama awmna party sawrkar meuh pawhin a Dan bawhchhiat nasa lutuk (eirukna lianpui) tarlana a awm tak avangin a thiltih an cancel sak hi Minister ni tlak lo a ni tih tarlanna a ni a, a MLA puite pawhin thup ngaihna awm miah lova a thilsual tih cancel leh ngei an phut hi Rs.22,48,00,000/- chuang daih a ni,” tiin hetiang hlemhletna lian tak titu a nih avangin Minister atanga vang nghal tur an phut thu an sawi a ni.

MNF Thalaite chuan Mizoram State University Bill 2025 Assembly a sawiho laiin NEP 2020 angin Lunglei-ah Mizoram State University a dah theih loh thu uar tak a sawi thu leh a thusawi angin Bill pawh passed a nih thu sawiin, “Kum khat pawh a liam hmain Cabinet rorel angin Mizoram State University chu Lunglei-ah suan a nih tur thu a puang leh lawi a, Cabinet rorel anga sawn a nih thu a sawi hnu daihah Cabinet in By-Circulation-in an passed leh hnuhnawh tih document atangin finfiah a ni thung a ni,” tiin tum hnih Mizoram mipuite a bum avangin a ban an phut tih an sawi a. Hei bakah hian Dr. Vanlalthlana chu a Department chanpual Taxation Department leh I&PR Department te chu laksak a lo ni tawh nia sawiin, ICT Department phei chu a bo ta emaw tih mai turin a awm mek thu leh School Education Department leh Higher Education Department te pawh a sawp chhe mek niin an sawi a, Kum 2026-2027 Academic Session tan hun atan March 23 ruat chungchang ah thla khat em pawh inbuatsaihna emaw, chawlhlawk emaw awm miah lova Sikul Calendar an siam chuan Zoram nu leh pa a ti buai em em niin an sawi bawk a ni.

Hetihlai hian ZPM Party chuan nimin khan thuchhuah siamin, “MNF Party te Vawiin khan Vanapa Hall kawtah an pungkhawm a, dik lo takin Minister Dr. Vanlalthlana an puh a, hei hi a pawi kan ti hle. Dan bawhchhiatna pakhatmah nei lo Minister heti taka Party pakhat meuhin an bei duh hi thil an hriatchian loh vang nge, an hriatchian duh loh vang zawk tih kan zawt a ni,” an ti.

ZPM chuan thudik lova MNF Party ten Dr. Vanlalthlana an puhna, PM-USHA Tender chungchang hi Committee on Petitions 2025 Chairman chuan January ni 13, 2026 khan a lo sawi-fiah daih tawh tih tarlangin, “Committee on Petitions chuan sum kal fel lo a chhui lo a, PM-USHA chungchang chhui turin Committee hran a din lo a, Special Report a thehlut lo bawk. Tendering process chungchang a ni a, sum chungchang a ni lo. Tender process chungchanga hrilhfiah dan (interpretation) inan loh avangin, Tender nawn (re-tender) turin recommendation a siam mai a ni,” tiin an tarlang a. “Higher & Technical Education Department chuan PM-USHA hnuaia hna thawh tur dan angin Open Tender a chhuah a, a chhanna enfiah a nih laiin Tender chhangtu Contractor te atangin 'complaint' a awm a. 'Complaint' chu Committee on Petitions ah thehluh niin anni hian an chhuichiang ta a, Assembly dan angin Speaker hnenah rawtna an thlen thei a ni. PM USHA tender pawh hi chutianga dan ang taka kalpui a ni,” an ti a. Hei bakah hian Dr. Vanlalthlana chu dawta puha tihhniam tumin MNF Party hian hma an la nasa hle niin ZPM Party chuan an sawi bawk.