BSF (GD)-ah Certificate lem hmangin lak niin sawi

Mizo Students’ Union (MSU) chuan SSU hnuaia BSF (GD) ah Mizoram Certificate lem hmangin hnamdang mi pariat (8) lak an nih thu an sawi.

MSU General Hqrs. President B. Lalkhawngaihzuala chuan Staff Selection Commission (SSC) chuan kum 2024 khan Border Security Force (BSF) hnuaiah Constable GD (General Duty) tur lakna Examination a buatsaih thu leh he Examination-ah hian Mizoram State quota-a mi 10 lak zingah mi 8 chu Mizo ni lo leh Mizoram mi ni lo an nih thu a sawi a. Heng mi pariat te hian DC Aizawl leh DC Mamit atanga lakchhuah ni awm tak Residential Certificate an nei vek nia sawiin, “Amaherawh chu an Residential Certificate hi Ministry of Home Affairs, Subsidiary Training Centre, Border Security Force, Indore chuan verification ti turin Aizawl DC leh Mamit DC te chu July ni 19, 2025 khan a rawn hriattir a. He Verification ti tura an hriattirna leh DC ten an chhanletna hi RTI hmangin MSU chuan a dil chhuak a. Aizawl DC hian August ni 4, 2025 khan chhanna thawnletin, heng mite Residential Certificate hi a lem a nih thu an hriattir a. Mamit DC pawhin September ni 1, 2025 khan chhanna thawnletin, heng mite Residential Certificate hi a lem a nih thu leh Certificate Issue tu hming anga tarlan, ‘Lalhmingliana, SDC’ tih chu hetih hunlai hian hetiang mi an awm loh thu an hriattir bawk,” a ti.

Heti chung hian heng mite hian January ni 10, 2025-a training an zawm chu an chhunzawm zel thu leh January ni 24, 2026 khan training chu zovin Jammu leh Kashmir lamah post vek an nih thu pawh MSU President chuan sawiin, “Heng mite hian Certificate lem chiang tak hmanga Mizoram quota an lo luah ve ringawt hi a pawi kan ti hle mai a. Aizawl DC leh Mamit DC ten Certificate lem a ni tih an hriattir chunga an training leh an service an chhunzawm thei tho mai hi mak kan ti a, hemi chungchangah hian thil fel lo lian tak a awm niin kan hria a. Hei hi chhuichian a nih theih nan leh heng mite hi hremna pek ngei an nih theih nan thuneituten hma la thuai se kan duh hle a ni,” a ti.

MSU President chuan BSF hnuaia Constable (GD) exam-ah hian Mizo dik tak, an Certificate pawh dik vek mi pahnih an tlin thu leh an lawmpui thu pawh sawiin, “Hetih mek laia Mizote seat ve tur, Certificate lem hmanga hnamdangin dik lo taka an lo luahlan hi hnam tan a pawi em em a, chhui chian ngei a ngai a ni. Heng mi pariat hi awm lo ta se, Mizo pariat dang tan seat a awm thei dawn tihna a ni a, chuvang chuan he thu hi kan ngai thutak hle a ni,” a ti a. Ministry of Personnel, Public Grievances & Pensions chuan Central sawrkar hnuaia hna lakah ST te tan cut off mark atangin 7.5% relaxation an siam thu leh BSF, CISF, CRPF, SSB, ITBP, AR, SSF-ah te hian Constable (GD) atan State Wise quota siam vek a nih thu a sawi bawk a ni.