MZP in Dan pass thar an thlawp tlat thu an sawi

Mizo Zirlai Pawl (MZP) chuan ‘The Mizo Marriage and Inheritance of Property (Amendment) Act, 2026’ chu tha an tih thu leh an thlawp tlat thu an sawi.

India sawrkarin bomb hmanga Mizoram a beih hriatrengna atana MZP-in March 5-a ‘Zoram Ni’ an hman thin chu nimin khan a vawi 19-na atan MZP Conference Hall-ah hman leh niin he hunah hian MZP President Dr. C. Lalremruata chuan tunhnaia Mizoram Legislative Assembly in Dan ‘The Mizo Marriage and Inheritance of Property (Amendment) Act, 2026’ a siam chu kil hrang hrang atanga sawi a tam thu sawiin, “He Dan hi MZP chuan tha a ti a, a thlawp (support) a ni,” a ti a. “Heti tak maia Politics-a inbeihna atan leh hnamdang pasal nei ten kan sawisel chiam mai hi a mak khawp mai. MZP chuan hun engemaw chen kalta atang khan kan hnam kal zel tur thlirin Hnamdang Nupui/Pasal-a neilo tura inzirtirna ni kan lo hmang tawh thin,” tiin Zirlai tam takin hnamdang nupui pasal-a neilo turin thutiam an lo nei tawh thu a sawi bawk.

MZP President chuan India in Jet Fighter hmanga Mizoram a beihna champha March ni 5 chu MZP chuan kum 2008 atang khan a lo serh (observe) tawh thin tih sawiin, “India huatna ni emaw, hel tumna rilru chawh thawh tumna lam a ni lo a, lungrual takin he ni hi kan serh-a, ram tana nunna hlantute leh hliam te chawimawina leh zahna kan hlan nawn leh a, he ni hi hnam inpumkhatna ni atan, kan hliam hlui te dam se hmalam panna ni atan he ni hi kan hmang a ni,” a ti bawk.

Kumin-a Zoram Ni-ah hian ‘I ram leh hnam humhalh la, khawvelin a dem lovang che’ tih chu thupui-ah hman niin Talk Show neih a ni a, mithiam hrang hrang ten thu an sawi a ni.