Myanmar raltlan te tan sumdawn khap a nih thu Home Minister in Assembly House a hrilh

Home Minister K. Sapdanga chuan Myanmar atanga rawn raltlante tan sumdawn khap a nih thu sawiin, Mizoram-a raltlante Biometric Enrolment neih mek niin February 5, 2026 thleng khan Myanmar raltlan mi 26,381 chhinchhiah an nih tawh thu leh chhinchhiah loh mi 1,974 hmabak an la awm thu a sawi bawk.

Nimin-a Mizoram Legislative Assembly thutkhawm zawhna leh chhanna hun ah Myanmar atanga Mizoram-a raltlan rawn lut te chungchang sawichhuah niin BJP Member Dr. K. Beichhua chuan Myanmar atanga rawn raltlante chu an dinhmun a tha lo tih hriat a nih rualin, tun dinhmunah chuan Silchar leh Guwahati-ah te pawh an duh duhin an kal ta mai niin a lan thu a sawi a, “A veiawm, sumdawn leh eizawnna dap kawngah leilung fate ang maia phalsak an ni em? Awmna bik awm loa duh duha phalsak an ni em?” tiin a zawt a. Home Minister chuan raltlante an sumdawng tih chu sawrkarin a hriatpui loh thu sawiin, “Raltlante hi an sumdawn phal a ni lo a, phal chi pawh a ni lo. Khap a ni. A rukin sumdawng deuh neuh neuh niawm tak a ni. Theihtawpin kan in chhui zel a, hriattheih chinte chu inkhap a, man tulte man a ni,” a ti a, an thil zawrh leh tawlh a zirin thubuai rip tak tak awrh pawh an awm mek thu a sawi a ni.

Home Minister chuan Raltlante chu an duh duha awm phal an nih hranpa loh thu sawiin, “Kan unau lo chhukthla te hi mangang, hlauthawng leh harsa taka rawn chhukthla an ni. Sawrkar duhna hmunah an awm thei bik lo a, anmahni duhna hmunah pawh an awm thei chuang lo. Hmun rem rem, School-ah te, an chhungte In-ah te an awm darh nuai. An awmna hmun tur ruahman mah ila an awm tak tak thei lo,” a ti.

INC Member C. Ngunlianchunga chuan Mizoram atangin tuialhthei Myanmar lamah nasa taka phurh luh a nih thu sawiin, “Serchhip, Lunglei leh Tipa-ah Chhiah lak thin a ni. An phurhlut nasa a, chhiah an lak pawh a tam ang, sawrkar ah lut se thatpui tham a ni ang,” tiin Police Chhiah lak hi sawrkarin a hriatpui leh pui loh a zawt a. Home Minister chuan Chhiah lak an hriat loh thu leh a lo zawh tur thuin a chhang bawk.

ZPM Member Lt. Col. Clement Lal-hmingthanga zawhna chhangin Home Minister chuan, “Zion Veng, Champhai-a raltlante awmna hmun tur sak hi Champhai Sub-Hqrs. YMA sak a ni a, sawrkar chuan raltlante puihna atana sawrkar laipui atanga tanpuina a dawn atangin an dil angin pek thin an ni. Chhungkaw 75 vel luah theih tura sak a ni,” a ti bawk.