March thla Zirtawpni vawi 2-na ah Chapchar Kut hman tawh tur

Kumtin-a Chapchar Kut hman thin chu March thla Zirtawpni vawi hnihna ah hmang tawh turin ruahmanna siam a ni.

Nimin-a Mizoram Legislative Assembly thutkhawm zawhna leh chhanna hunah Art & Culture Department changtu Minister C. Lalsawivunga chuan Chapchar Kut chu Mizote kut ropui ber a nih angin tun aia nasa leh ropui zawka hman nih theih nan hmalak a nih thu a sawi a, kumtin Chapchar Kut chu March thla Zirtawpni hmasa berah hman thin a ni a, hetihlai hian Central KTP General Conference neih hun nen a in nan avangin, hemi chungchanga thu thehluh chu Chapchar Kut Organising Committee chuan a ngaihtuah hnuah sawrkar lam zawk chu a tawlh theih avangin kumin hian Chapchar Kut neih hun chu March ni 13-ah an sawn a, kumtin March thla Zirtawpni vawi hnihna ah hman tawh tur a nih thu a sawi a ni.

Art & Culture Minister C. Lalsawivunga chuan State danga Mizoram House-ah te Chapchar Kut an hman ve theih nan pawisa dah a nih thu pawh zawhna chhanga sawiin, hetihlai hian Mizoram chhung RD Block hrang hranga cheng, Aizawl pan thei lote'n an chenna khuaah te Chapchar Kut an lo hman ve theih nan sawrkar chuan pawisa a la dan theih anih rih loh thu a sawi bawk a ni.