Meningococcal Meningitis-ah chi-aina tur a awm lo

Tunhnaia Shillong-a Assam Regimental Centre (ARC)-a Meningococcal Meningitis (Thluaka khawsik lût) natna ni a rinhlelh hri leng ah Mizoram mipui tan chi-aina tur a awm lo tih sawrkar chuan an sawi.
Mizoram sawrkar Directorate of Health Services hnuaia Integrated Diseases Surveillance Programme (IDSP) chuan Shillong-a Assam Regimental  Centre  (ARC) a Meningococcal Meningitis (Thluaka khawsik lût) natna ni a rinhlelh hri lêng chungchângah hian thuchhuah siamin uluk taka thil awmdan thlithlai reng a ni tih an sawi a. “Tûn dinhmunah chuan he natna hrilêng hi ARC bâk hmundangah hmuhchhuah a la ni lova, Meghalaya Sawrkar pawhin theihtâwp chhuahin hri darh loh nân hmâ a la a, he hrilêng hi taidarh lova control anih avângin Mizoram mipuite tân lo chî-aîna tûr a awm lo tih kan inhriattîr a ni,” an ti.

Tun dinhmunah he natna hrilêng hi Mizo-ram-ah hmuh la ni loh mah se he natna chungchang lo hriat a pawimawh thu sawiin IDSP thuchhuah chuan tarlang bawkin, ‘Meningococcal’ natna hi ‘Neisseria menigitidis’ in a thlen a nih thu leh hei hian Meningitis leh Meningococcemia condition-te a thlen thei tih an tarlang a. He natna hi Khawsik sâng lo awm thut, Lu na nasa, Nghâwng khawng, Luak/Luak chhuak, Taksa duk, Taksa dâng leh taksa eng, Nikhawhrelo leh Taksa khâwl hnathawk thei lo  te-a a lanchhuah thu sawiin, he natna hi Inhnaih taka awm leh khawsak, Khuh, Hahchhiau leh Taksa atanga tuiril chhuak atanga inkaichhawn theih a nih thu an tarlang bawk.

He natna laka inven dan hrang hrangte pawh IDSP thuchhuah chuan tarlangin, Inrinhlelhna neih chuan rang taka Damdawi In pan tur a nih thu te; Puipunnaa kal loh te; Mask vuah te; Khuh leh hahchhiauvin ka hup tur a nih thu leh Kut sil ngun leh sanitizer hman tur a nih thu te an tarlang a. “He natna hi natna chhuak thar a ni lova, Doctor-in a chawh antibiotic hmanga enkawl dam theih a ni,: an ti bawk.