Myanmar atanga raltlan za zela 97 chuang chhinchhiah tawh

Myanmar atanga Mizoram-a raltlan rawn lut la awmte an mit naute leh kutze thla hmanga chhinchhiahna kalpui mek chu za zela 97 chuang zawhfel a ni tawh.

Home Department atanga thudawn danin Myanmar raltlan Mizorama awm mek mi 28,355 zinga mi 27,574 te chu an mit naute leh kutze thla hmanga chhinchhiah an ni tawh a, chhinchhiah tawhte hi za zela 97.25 a tling tawh a ni. Mizoram-a Myanmar raltlan awm tamna ber Champhai District bakah Aizawl, Lunglei leh Serchhip District-ah te chuan Biometric Enrolment hi zawhfel a ni tawh a, raltlan awm tamna ber dawttu Lawngtlai District-ah pawh za zela 96.74 zawhfel a ni tawh a ni. Lawngtlai District-ah hian Myanmar raltlan 5,034 an awm mek a, an zinga mi 4,870 te chu chhinchhiah a ziahluh an ni tawh. Hetihlai hian District dang, Kolasib, Saitual, Mamit, Hnahthial, Khawzawl leh Siaha District-ah te chuan kumin ah Biometric Enrolment hi an chhunzawm lo niin a lang a. Home Department hotute chuan a chhan an hriat bik loh thu Akashvani News, Aizawl an hrilh a ni.

Mizoram-ah hian Bangladesh atanga raltlan mi 2,360 an awm mek bawk a, Lawngtlai District-ah tam berin mi 2,042 an awm a, Serchhip District-ah mi 235, Lunglei District-ah 76 leh Aizawl District-ah mi 7 an awm bawk. Serchhip, Lunglei leh Aizawl District-a Bangladesh raltlan awmte hi Biometric Enrolment tih zawh vek a ni tawh naa Lawngtlai District-a mi 2,042 zinga 183 chauh chhinchhiah an la nih avangin Mizoram-a Bangladesh raltlan chhinchhiah zat hi za zela 21.23 chauh a la ni.