Mizoram University Convocation vawi 20-na India Vice President hovin hman a ni
MZU Multipurpose Hall-a MZU Convocation vawi 20-na ah hian Vice President C.P. Radhakrishnan chuan India hmarchhaka thiamna sang zawk zirna In tha leh Campus nei tha berte zinga mi Mizoram University-a Convocation a hmanpui thei chu lawmawm a tih thu sawiin, nakin lawka ram leh hnam bakah mahni mihring puite rawngbawl sak tur thalaite nena hun hman chu nuam a tih zawng a nih thu a sawi a. Hlawhtlinna chang zawng zawngte thinlung taka a lawmpui thu sawiin, an phena awm tlat nu leh pa leh zirtirtute chu fakawm a tih thu sawiin, Degree chu zir zawh entirna Certificate mai ni lo, hmathar lakna tur entirna Certificate a nih thu a sawi a. “Convocation chu hlimna hun leh kalzelna tura mawhphurhna thar lakna hun a ni,” a ti bawk.
Vice President chuan India rama remna thuthlung ziah hlawhtling berte zinga mi ‘Mizoram Peace Accord 1986’ chuan inremlohna dawhkan hmanga chinfel theih a nihzia a lantir tih sawiin, Zirna than zel nan muanna a pawimawh thu leh hmasawn nan ram ralmuang nih a tul thu a sawi a. Act East Policy-in hmarchhak State-ah danglamna nasa tak a thlen thu leh Asia chhim chhak ramte luhka pawimawh tak a nih tir thu a sawi a. Prime Minister kaihhruaina hnuaiah hmarchhak chu India rama hmasawnna bung pawimawh a nih thu sawiin, Zalenna hmuh atanga kum 100-na, kum 2047 ah India chu ram intodelh leh hmasawn 'Viksit Bharat' a siam tumin sawrkarin theihtawp a chhuah tih sawiin, “Hei hi sawrkar programme mai a ni lova, kan zavaia tanrualna tur anih avangin thalaite'n mawhphurhna nasa tak an nei,” a ti bawk.
Thalaite chu hna zawngtu nih ngawt tum lova, a siam saktu nih tum tur leh remchanna zawngtu aia siam saktu nih tum turin Vice President chuan fuih bawkin, Hmarchhak State te'n theihna nasa tak an neih thu a sawi a, thalaite hmelma lian ruihhlo erawh nasa zawka do tlan a tul tih a sawi a. Zirlaite chu a eng zawnga hmalam thlir turte, tunlai thiamna chhuak thar apiang thiam bel tum turte, hun vawng dik tur leh Social Media hman chin tawk hre turte in a chah a. India rama ziak leh chhiar thiam tamna ber leh a ram zau zawng atanga teha ramngaw nei tha a ni chu chhuanawm a tih thu sawiin, thalaite chu hmasawnna tlo leh ngelnghet, chhehvela thil awmte tibuai lo zawnga hma la turin a fuih bawk.
He hunah hian MZU Registrar Prof. Lalnundanga'n Vice Chancellor phalna laa Convocation tan theih thu a puan hnuah Mizoram University Vice Chancellor Prof. Dibakar Chandra Deka chuan kalkhawmte lawmna thu a sawi a. Degree, Gold Medal leh Book Prize Winner lawmman te a hlan a. Larsap General (Dr) Vijay Kumar Singh, Chief Rector of Mizoram University leh Chief Minister Lalduhoma te chu Khualzahawm niin thu an sawi bawk a ni.
MZU Convocation-ah hian zirlai 6385 te hnenah Degree hlan a ni a, he huna inlan (candidates receiving degrees in person) 1113 zinga Doctor of Philosophy 147, Master of Philosophy 3, Master's Degree 486, Master's Professional 137, Bachelor's Degree 121, Bachelor's Professional 174, Gold Medalist 43 leh Book Prize dawngtu 2 te kutah Degree leh lawm-man hlan a ni.
Mizoram University hi kum 2001 khan din niin, tun dinhmunah Department 39 a awm a. Centre 2 te'n School of Study 10-ah UG, PG leh Ph.D programme an kalpui mek a. Affiliated College 40 leh Constituent College 1 a nei mek bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!