BCM rorelna sang, Assembly vawi 130-na zawhfel a ni
BCM Assembly-ah hian kar kalta Ningani atang khan President thar Rev. Prof. R .Zolawma kaih-hruaina hnuaiah Rorel neih niin Area Baptist Council (ABC) siamrem tur pahnih leh Bial thar hawn tur pathum te remtih a ni a, Probationary Pastor, Minister atana Assembly-a nemngheh tur mi 9 leh Pro. Pastor nilo, Minister atana nemngheh tur mi 2 leh Pastor atana lak thar mi 5 an awm thu tarlan a ni a, an thurel langsar zingah Baptist English School (BES) awmna hmun sawn, Inneihna buat-saih chungchangah hautak lo zawnga buatsaih tih te, Kohhran mi Politicsa in hmangte laka BCM-in beiseina a neih dan hrang hrang tarlan te puan-chhuah tura ruahmanna chu rem an ti a. Ruihhlo ngaite tana Half Way Home te, Hlemhletna dona kawnga chak zawka hmalak te, Sri Lanka-a Mission Station buatsaih leh rawngbawlna zau zawk neih bakah Hnahthial-a Baptist Higher Secondary School din te an rel bawk a. BCM-in Certificate an neih (Inneih, Nauhlan, Baptistma) re-issue leh original hriat hranna atan Certificate-a coding siam pawh remtih a ni bawk.
Report-in a tarlan danin Mizoram Baptist Kohhran hnuaiah hian Member 1,86,772 awmin, kum hmasa aia member punna chu 2,332 a ni a, BCM hnuaiah hian ABC 17, Pastor Bial 95 leh Tualchhung Kohhran 711 awm mekin kum 2025 Assembly leh 2026 Assembly inkara boral Ordained Pastor 5 leh Kohhran Upa 72, an vaiin mi 77 sunna hun hman a ni bawk a, Mission Report chuan Mission Field 19 leh Station hrang hrang 7-ah rawngbawl mek a nih thu tarlangin, Missionary leh Mission hnuaiah thawktu mi 1350 an awm thu te, kum 2025-2026 chhungin Kohhran thar 31 leh Fellowship 18 dinin ringthar 5063 an awm thu a tarlang bawk.
Comments
Post a Comment
I ngaihdan i sawi hian mipui ngaihdan i tarlang a ni!