International Women’s Day pualin hun hman a ni

Nimin March 8, 2026 kha khawvel puma Hmeichhia te ni, ‘International Women's Day’ a ni a, Give to Gain, ‘Pekin lukhawng a nei’ tih chu kumin hian thupui atan hman a ni.
International Women's Day puala thuchah a tihchhuah ah Women & Child Development Director Zoramthangi Chhangte chuan tunlai khawvelah hmeichhiate dinhmun a tha tawh tia sawi a nih laiin mahni Inchhungkhura hleilenna tuar an la tam thu a sawi a. Women Helpline atanga phone call an dawn atangin hmeichhia tam tak mahni Inchhunga kut tuar an la tam hle tih a lan thu a sawi a. Zirna lamah pawh tunlaiah hmeichhiaten duh duh an zir thei tih a ni chungin STEM Education-ah hmeichhia an la tlem thu leh Subject thenkhat, Physics, Engineering leh Maths te chu nu leh pa tam takin an fanu te zir chi-a ngai lo an la tam thu a sawi a. Infiamna lamah pawh hmeichhia te dinhmun a la hniam thu sawiin, a bik takin Football-ah an la hniam thu a sawi a. Nu leh pa ten an fanute eizawnna tura ngai ngam lo an la tam tih sawiin, nu leh pa tam tak rilru puthmang thlak a tul thu a sawi a ni.

National Commission for Women, New Delhi leh State Commission for Women chuan ram pumah ‘Maha Jan Sunwai’ an buatsaih dawn a. International Women’s Day pual hian District hrang hrangah an remchan dan angin Free Public Legal Hearing neih a ni dawn a, hetah hian hmeichhia dikna chanvo rahbehna hrang hrang tuar te chuan complain a thehluh theih dawn a ni. Inchhungkhura hleilenna, eng kawng pawha tawk te, nupa kar harsatna avanga hmeichhe chunga tawrhna thleng te, hnathawhna hmuna thawhpui mipate atanga harsatna tawk te, chhaih nawmnah tawkte leh eng kawng pawha hmeichhia nihna avanga hleilenna leh nek chepna tawk tan harsatna a thlen theih ang.

International Women’s Day hi kumin hian Pathianni-ah a tlak avangin Mizoram-ah chuan Inrinni khan hmun hrang hrangah hun hman niin Vawiin lama hun hmang tur an awm bawk a. All Mizoram Elected Womens Representatives Pawl chuan Inrinni khan Durtlang-a Synod Hospital-ah Damlote tan luanchhuahna hun hmangin damlo 300 tan chaw chhun an pe a. Aizawl Municipal Corporation-a Corporator C. Lalchhandami hnen atangin thuchah ngaihthlak a ni bawk.

International Women’s Day pual hian Vairengte CIJWS te chuan an Complex-a Nair Hall-ah Inrinni khan hmeichhia leh Naupang te tan bik a thlawna inentirna hun an buatsaih a, Medical Officer Captain Anjali Sharma chuan hmeichhia te hriselna kawnga inenkawl dan tur leh hriat tur tul te kalkhawm te hnenah a sawi a. Apollo Clinic Silchar-a Opthalmologist Dr. Bikram Das, Gynaecologist Dr. C. Lalnunpuia leh Dentist ten damlo te enin a thlawnin damdawi an sem nghal bawk a ni.